Սուրբ Սոֆիայից առաջ Թուրքիայում բազմաթիվ եկեղեցիներ են մզկիթի վերածվել. թուրքական կայքի անդրադարձը (լուսանկարներ)

Թուրքական gaziantephaberler.com կայքը գրում է, որ չնայած վերջին օրերին Թուրքիայի իշխանությունների նախաձեռնությամբ Սուրբ Սոֆիայի տաճարի` մզկիթի վերածումը գտնվում է ուշադրության կենտրոնում, այնուամենայնիվ, Թուրքիայում շատ եկեղեցիներ կան, որոնք շատ ավելի առաջ են մզկիթի վերածվել, և դրանցից մեկը Գազիանթեփում (պատմական Այնթափ) գտնվող հայկական Սուրբ Աստվածածին եկեղեցին է:

Նշվում է, որ 1873-1893 թվականներին հայ մեծանուն ճարտարապետ Սարգիս Պալյանի նախագծած և Սարգիս Թաշչյանի կառուցած այս եկեղեցին հետագայում թուրքերի կողմից որպես բանտ է օգտագործվել, իսկ այժմ կոչվում է «Քուրթուլուշ» մզկիթ և համարվում է Գազիանթեփի խոշորագույն մզկիթներից մեկը:

Եկեղեցին մզկիթի կարգավիճակ է ստացել 1980 թվականին` Գազիանթեփի այն ժամանակվա նահանգապետ Աբդուլքադիր Աքսուի նախաձեռնությամբ: Այդ ժամանակ մզկիթի վրա նաև փոփոխություններ են կատարվել: Եկեղեցու զանգակատունը դարձել է մինարեթ:

Աղբյուրը նշում է, որ հայկական ճարտարապետության այս գանձը չի կորցրել իր տեսքը:

Եկեղեցու` շուրջ 1 տոննա կշռող զանգը կառուցվել է Բրազիլիայում` լոնդոնահայ բարերար Հրանտ Քյոշքերյանի միջոցներով: