Բայդենը պետք է դադարեցնի էսկալացիան Ասիայում՝ Չինաստանի հետ պատերազմը կանխելու համար

ԱՄՆ նախագահ Ջո Բայդենը պետք է դադարեցնի ԱՄՆ իշխանությունների կողմից Ասիա-խաղաղօվկիանոսյան տարածաշրջանում իրավիճակի սրման գործընթացը, որպեսզի կանխի Չինաստանի հետ հնարավոր աղետալի պատերազմը։ ՏԱՍՍ֊ի հաղորդմամբ՝ Quincy Institute հետազոտական ​​կազմակերպության աշխատակից Մարկ Քուկիսի այս կարծիքը տրված է հինգշաբթի օրը Responsible Statecraft պորտալում հրապարակված նրա հոդվածում։

Նա կարծում է, որ Ասիայում ԱՄՆ-ի էսկալացիան հանգեցրեց Պեկինի պատասխան քայլերին ռազմական ոլորտում։ «Ամբողջ տարածաշրջանը սպառազինությունների մրցավազքի մեջ է, և Չինաստանն արդեն ունի ահռելի ուժ, որը կարող է դիմակայել ԱՄՆ ուժերին Հարավչինական ծովում», - ասաց փորձագետը՝ կանխատեսելով «աղետալի սցենար բոլոր կողմերի համար»:

Այսպիսով, «ամերիկյան ուժերը, ամենայն հավանականությամբ, լուրջ կորուստներ կունենան, իսկ բազմաթիվ ավիակիրներ և տարածաշրջանային ավիաբազաներ կվնասվեն կամ կոչնչացվեն»։ «Միևնույն ժամանակ, չինական ուժերը կդիմանան ամերիկյան հարձակման պատճառած նախնական վնասին և կպահպանեն բավականաչափ ուժ, որպեսզի շարունակեն մեծ կորուստներ պատճառել հակառակորդին», - ասաց փորձագետը։