Խաղաղության պայմանագրի տեքստի վրա աշխատանքն իրականացվում է անմիջապես Բաքվի և Երևանի միջև․ Հաջիև

Ադրբեջանն իսկապես հավատում է, որ Հայաստանի հետ խաղաղության պայմանագիր կնքելու պատմական հնարավորություն կա, և մենք չպետք է բաց թողնենք այս հնարավորությունը։ Այս մասին գերմանական Berliner Zeitung թերթին տված հարցազրույցում ասել է Ադրբեջանի նախագահի արտաքին քաղաքականության գծով օգնական Հիքմեթ Հաջիևը։

«Խաղաղության պայմանագրի տեքստային մասով զգալի առաջընթաց է գրանցվել, սակայն մի քանի չլուծված խնդիրներ դեռ կան։ Ադրբեջանի և Հայաստանի միջև լարվածության հիմնական օջախը՝ Ղարաբաղի հարցը, ամբողջությամբ հանվել է օրակարգից։ Այս պահին մենք խաղաղության պայմանագրի կնքման համար լուրջ խոչընդոտներ չենք տեսնում։ Մենք այժմ ականատես ենք լինում երկու երկրների հարաբերություններում վերջին երեսուն տարիների ամենահանդարտ ժամանակաշրջանին։ 

Վերջերս Սանկտ Պետերբուրգում Ադրբեջանի նախագահի և Հայաստանի վարչապետի ոչ պաշտոնական հանդիպումը նույնպես դրական ընթացք ունեցավ։ Սակայն կոնկրետ ժամկետների մասին դեռ դժվար է խոսել, քանի որ գործընթացն ավարտին հասցնելու համար անհրաժեշտ են հետագա բանակցություններ Հայաստանի և Ադրբեջանի միջև»,- ասել է Հաջիևը։ 

Նրա խոսքով՝ սահմանների սահմանազատումը տեխնիկական և երկարատև գործընթաց է, մինչդեռ խաղաղության պայմանագրի կնքումը մեծ ջանքեր չի պահանջում և հիմնված է միջպետական ​​հարաբերություններում միջազգային իրավունքի նորմերի և սկզբունքների փոխադարձ ընդունման վրա։ 

«Մեր կարծիքով՝ խաղաղության պայմանագիրը չպետք է պատանդ լինի սահմանների սահմանազատմանը։ Թեև խաղաղության համաձայնագրի և սահմանների սահմանագծման և սահմանազատման շուրջ բանակցությունները շարունակվում են զուգահեռաբար, դրանք ընթանում են երկու տարբեր ձևաչափերով։ Մինչ այժմ երկու երկրների սահմանազատման հանձնաժողովները հինգ անգամ հանդիպել են՝ քննարկելու գործընթացի հիմունքները։ Վերջին հանդիպումը կայացել է այս տարվա նոյեմբերին՝ ադրբեջանա-հայկական սահմանին։ 

Հանդիպման ընթացքում կողմերը պայմանավորվել են սկսել աշխատանքները Հայաստանի և Ադրբեջանի միջև պետական ​​սահմանագծման և սահմանների անվտանգության հարցերի հանձնաժողովի համատեղ գործունեության կանոնակարգի նախագծի համաձայնեցման շուրջ և ակտիվացնել հանձնաժողովների հանդիպումները։ Մենք այս համաձայնագիրը նույնպես դիտարկում ենք որպես դրական նշան՝ հատկապես այն պատճառով, որ այն ձեռք է բերվել երկկողմ ձևաչափով»,- ասել է Հաջիևը։

Հարցին, թե երկու երկրները եթե ունակ են արդյունավետ բանակցություններ վարել առանց միջնորդների, ո՞ր ձևաչափն է ամենաարդյունավետը՝ ադրբեջանա-հայկական բանակցությունները, 3+3 ձևաչափը հարևանների՝ Իրանի, Ռուսաստանի և Թուրքիայի հետ, թե՞ Արևմուտքի մասնակցությամբ բանակցությունները՝ լինի դա ԱՄՆ, թե ԵՄ, Հաջիևը պատասխանել է․ 

«Յուրաքանչյուր ձևաչափ ունի իր առավելությունները, և դրանց արդյունավետությունը համեմատելը ճիշտ չի լինի: Տարբեր փուլերում տարբեր ձևաչափեր մեզ թույլ տվեցին առաջ գնալ, և մենք երախտապարտ ենք գործընթացում ներգրավված բոլոր միջնորդներին։ Գտնվելու վայրը մեզ համար նշանակություն չունի: Ամենակարևորն արդյունքն է։ Մենք հանդես ենք գալիս արդյունքների վրա հիմնված բանակցությունների օգտին։ Մենք սկզբունքորեն դեմ չենք ազնիվ օգնությանը, բայց նախընտրում ենք ուղղակի բանակցությունները։ Այսօր խաղաղության պայմանագրի տեքստի վրա աշխատանքն իրականացվում է անմիջապես Բաքվի և Երևանի միջև»,- ասել է նա։