Նախկինում ավելացած խնայողությունները մսխվե՞լ են․ Գևորգ Պապոյանը՝ Սուրեն Պապիկյանին

Նախկինում ավելացած խնայողությունները մսխվե՞լ են․ Գևորգ Պապոյանը՝ Սուրեն Պապիկյանին

ԱԺ «Իմ քայլը» խմբակցության պատգամավոր Գեւորգ Պապոյանը Կառավարության հետ հարցուպատասխանի ժամանակ հայտարարեց, որ բյուջեի 2019 թվականի կատարողականի քննարկումից իր մոտ տպավորություն է առաջացել, որ շատ դեպքերում ճանապարհաշինության համար հատկացված գումարների մի մասը խնայվել է, նպատակները իրականացվել են, բայց բավականին մեծ գումարներ են խնայվել:

Պապոյանը հարց հնչեցրեց՝ կարելի՞ է ենթադրել, որ նախկինում եւս հնարավոր է եղել այդպիսի խնայողություններ անել, բայց գումարը շատ է գրվել ու ավելացածը մսխվել է:

Տարածքային կառավարման եւ ենթակառուցվածքների նախարար Սուրեն Պապիկյանը պատասխանեց, որ կարող է միայն ասել, որ 2019 թ. ընթացիկ տարվա ճանապարհաշինության մրցույթների արդյունքում միայն հիմնանորոգման ուղղությամբ գրանցել են տրամադրված միջոցների 5 միլիոն դրամի խնայողություն:

Ընդգծեց՝ սա ենթադրում է, որ այդ ավելացած գումարը վերաբաշխվել է եւ հավելյալ այլ ճանապարհների շինարարության վրա կծախսվի:

«Ես հիմա գնահատական չեմ ուզում հնչեցնել, թե որտեղ ինչ կոռուպցիոն մեխանիզմներ են եղել: Փառք տիրոջ, այս փուլում մեր իրավապահները դրանով հետեւողականորեն զբաղվում են եւ կարծում եմ մեզ դեռ սպասվում են բացահայտումներ»,- հավելեց Պապիկյանը՝ շեշտելով, որ ամեն ինչ անում են որակ-խնայողություն ճիշտ հարաբերակցություն պահելու համար: