Թուրքիայի արդարադատության նախարարությունը օրինական է ճանաչում Էրդողանի մասնակցությունը նախագահական ընտրություններին

Թուրքիայի արդարադատության նախարար Բեքիր Բոզդաղը հայտարարել է, որ Թուրքիայի գործող նախագահ Թայիփ Էրդողանի երրորդ ժամկետով առաջադրումը համապատասխանում է օրենքին:

Այս մասին, ինչպես հաղորդում է «Արմենպրես»-ը, հայտնում է թուրքական Haberler.com-ը:

«Թեկնածուն նախագահ Էրդողանն է, նրա թեկնածությունը լեգիտիմ է»,- ասել է  Բոզդաղը:

Թուրքիայում տարբեր  ընդդիմադիր շրջանակներ պնդում էին, որ երկրի սահմանադրության համաձայն՝ Էրդողանը չի կարող երրորդ անգամ առաջադրվել որպես նախագահի թեկնածու: Հակառակ տեսակետը պնդողներն էլ նշում են, որ երկրում տեղի ունեցած սահմանադրական փոփոխություններից հետո, երբ երկրում անցում է կատարվել նախագահական կառավարման համակարգի, սա լինելու է Էրդողանի երկրորդ առաջադրումը, ինչը սահմանադրությամբ թույլատրվում է:

Թուրքիայի գլխավոր ընդդիմադիր ձախ քեմալական Ժողովրդահանրապետական կուսակցության առաջնորդ Քեմալ Քըլըչդարօղլուն հայտարարել էր, որ Էրդողանի մասնակցությունը 2023 թվականին կայանալիք նախագահական ընտրություններին անօրինական կլինի։