Համապետական ծառատունկին ընդառաջ խորհրդակցություն Շրջակա միջավայրի նախարարությունում մարզպետների, մարզպետարանների ներկայացուցիչների և Երևանի փոխքաղաքապետերի մասնակցությամբ. Ռոմանոս Պետրոսյան

ՀՀ շրջակա միջավայրի նախարար Ռոմանոս Պետրոսյանը ֆեյսբուքյան իր էջում գրում է.

Համապետական ծառատունկին ընդառաջ խորհրդակցություն Շրջակա միջավայրի նախարարությունում մարզպետների, մարզպետարանների ներկայացուցիչների և Երևանի փոխքաղաքապետերի մասնակցությամբ

Այսօր մարզպետների, մարզպետարանների ներկայացուցիչների և Երևանի փոխքաղաքապետերի հետ խորհրդակցություն-քննարկում անցկացրեցի, որին մասնակցում էին նաև Շրջակա միջավայրի նախարարության Անտառային կոմիտեի նախագահը և «Հայանտառ» ՊՈԱԿ-ի տնօրենը։

Քննարկեցինք Երևան քաղաքում և մարզերում համապետական ծառատունկը պատշաճ կազմակերպելու վերաբերյալ մի շարք օրակարգային հարցեր, գույքագրեցինք բոլոր այն տարածքները, որտեղ կիրականացվի ծառատունկ, քննարկեցինք մարդկային և տեխնիկական ռեսուրսի հավասարաչափ բաշխմանը վերաբերող հարցեր։

Ողջունելով ներկաներին՝ նախ ներկայացրեցի «10 մլն ծառ» նախաձեռնության ընթացիկ իրավիճակը, ապա անդրադարձա այդ նախաձեռնության շրջանակում ապրիլի 25-ին նախատեսված համապետական ծառատունկին, հորդորեցի գործընկերներիս անել հնարավորը՝ ծառատունկի աշխատանքներն առավելագույնս արդյունավետ իրականացնելու համար։

Համապետական ծառատունկի ընթացքում նախատեսվում է․

100.000 տնկի, այդ թվում՝ վայրի խնձորենի, տանձենի և ընկուզենի հատկացնել Երևանի քաղաքապետարանին և հանրապետության խոշոր քաղաքներին ու համայնքներին՝ պուրակներում ու զբոսայգիներում ծառատունկ իրականացնելու համար,

200.000 տնկի տրամադրել մարզպետարաններին՝ տեղական ինքնակառավարման մարմինների և պետական գերատեսչությունների հետ համատեղ «Հայանտառ» ՊՈԱԿ-ի տնկարկներում նախանշված տարածքներում տնկելու համար։

Շրջակա միջավայրի նախարարության Անտառային կոմիտեի նախագահի ժ/պ Ա․ Պետրոսյանը ներկայացրեց նախատեսված տնկանյութի բաշխումն ըստ մարզերի․

Ք․ Երևան – 25.000

Արագածոտնի մարզ – 7000,

Արարտի մարզ- 7000,

Արմավիրի մարզ – 6000,

Գեղարքունիքի մարզ –8000,

Կոտայքի մարզ – 10.000,

Լոռու մարզ-7000,

Շիրակի մարզ – 10.000,

Սյունիքի մարզ – 7000,

Տավուշի մարզ – 6000,

Վայոց ձորի մարզ – 7000։

«Հայանտառ» ՊՈԱԿ-ի տնօրենի ժ/պ Պ․ Ցուգունյանը ներկայացրեց տնկվող ծառատեսակները՝ կաղնի, հացենի, թխկի, ընկուզենի,խնձորենի և տնկման համար նախատեսված տարածքներն ըստ հեկտարների։ Նա տեղեկացրեց, որ ՊՈԱԿ-ի մասնագետնները պատրաստ են օժանդակել տնկման աշխատանքների վերաբերյալ խորհրդատվությամբ։

Քննարկեցինք նաև տնկված ծառերի հետագա խնամքին վերաբերող հարցեր։

Խնդրեցի գործընկերներիս պատշաճ իրազեկել հանրությանը ծառատունկի անցկացման վայրերի և մասնակցելու եղանակների մասին՝ տրամադրելով համայնքային և անտառային տունկի համակարգողների կոնտակտները։

Հասարակական կազմակերպությունները և քաղաքացիական նախաձեռնությունները, ովքեր ցանկություն կհայտնեն մասնակցել համապետական ծառատունկին, կարող են դիմել

Անտառային կոմիտե՝ էլ հասցե՝ [email protected], հեռ․՝ (010) 65 17 38 կամ զանգահարել Շրջակա միջավայրի նախարարության աշխատակազմ 098 888283 հեռախոսահամարով։

#10մլն_ծառ #համապետական_ծառատունկ