Արտաշատում գրանցվել է ազգականի նկատմամբ սպանության փորձ

«Արտաշատ» բժշկական կենտրոնից ՀՀ ոստիկանության Արտաշատի բաժնում 2021թ. մայիսի 24-ին՝ ժամը 07.15-ին, հաղորդում է ստացվել այն մասին, որ մարմնի տարբեր շրջանների կտրած-ծակած բազմակի վերքերով իրենց մոտ է ընդունվել Արտաշատ քաղաքի 67-ամյա բնակչուհին: ՀՀ քննչական կոմիտեի տեղեկատվության և հասարակայնության հետ կապերի բաժինը տեղեկացնում է, որ ձեռնարկված միջոցառումների արդյունքում պարզվել է՝ կինը վերոնշյալ վնասվածքներն ստացել է նույն օրը՝ ժամը 06:30-ին, իր բնակարանում, որտեղ նրա հետ համատեղ բնակվող եղբոր թոռը խոհանոցային դանակով մի քանի անգամ հարվածել է նրա մարմնի տարբեր մասերին:

Դեպքի վայրի զննությամբ հայտնաբերվել են արնանման հետքեր, ինչպես նաև հանցագործության գործիք հանդիսացող խոհանոցային դանակը:

Դեպքի առթիվ ՀՀ ոստիկանության Արտաշատի բաժնում հարուցվել է քրեական գործ՝ սպանության փորձի հատկանիշներով, որի նախաքննությունն իրականացվում է ՀՀ քննչական կոմիտեի Արարատի մարզային քննչական վարչությունում:

Երիտասարդը ձերբակալվել է՝ 67-ամյա կնոջ նկատմամբ սպանության փորձ կատարելու կասկածանքով: Նախաքննությունը շարունակվում է: 

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: