Ճապոնիան անվտանգության նկատառումներից ելնելով ժամանակավորապես փակել է Հաիթիում դեսպանատունը
Ճապոնիայի կառավարությունը որոշել է ժամանակավորապես փակել Հաիթիում իր դեսպանատունը՝ անվտանգության վատթարացող իրավիճակի պատճառով։ Այս մասին երկուշաբթի հայտնել է Kyodo գործակալությունը ՝ վկայակոչելով երկրի ԱԳՆ-ին։
Հարեւան Դոմինիկյան Հանրապետությունում դեսպանատանը ժամանակավոր գրասենյակ է ստեղծվել, որը կզբաղվի Ճապոնիայի քաղաքացիներին օգնություն ցուցաբերելու հարցերով։
Ավելի վաղ Ճապոնիայի ԱԳՆ-ն իր քաղաքացիներին խորհուրդ էր տվել չմեկնել Հայիթի, իսկ արդեն երկրում գտնվողներին հորդորել էր անհապաղ լքել այն։ Հաիթիում տագնապի մակարդակը բարձրացվել է առավելագույնը չորսի։
Հայիթիի Հանրապետությունը վերջին ամիսներին խորը տնտեսական ճգնաժամի ֆոնին անվտանգության և հումանիտար իրավիճակի կտրուկ վատթարացում է ապրել։ Վառելիքի սուբսիդիաները կրճատելու կառավարության որոշումից հետո զինված ավազակախմբերը շրջափակեցին մայրաքաղաք Պորտ-օ-Պրենսում վառելիքի տերմինալը՝ խաթարելով երկրի գրեթե ողջ տնտեսական գործունեությունը և փակելով հիվանդանոցները:
Հոկտեմբերի սկզբին Հայիթիի վարչապետ Արիել Հենրին խնդրել է միջազգային հանրությանը օգնել զինված ավազակախմբերի և հումանիտար ճգնաժամի դեմ պայքարում։ ՄԱԿ-ի Անվտանգության խորհուրդը պատժամիջոցներ և զենքի էմբարգո է սահմանել Հայիթիում ծայրահեղական խմբավորումների դեմ։ Կազմակերպության գլխավոր քարտուղար Անտոնիո Գուտերեշն առաջարկել է դիտարկել միջազգային ուժերի տեղակայումը Հաիթիում հումանիտար ճգնաժամը լուծելու համար, սակայն երկրի որոշ քաղաքական ուժեր դեմ են օտարերկրյա կոնտինգենտի ներդրմանը։
Կարծիքներ