Pink Floyd-ի հիմնադիրը «գրողի ծոցն» է ուղարկել Ցուկերբերգին

Pink Floyd ռոք-խմբի հիմնադիրներից մեկը՝ Ռոջեր Ուոթերսը, կոպիտ արտահայտություններով մերժել է Facebook–ի հիմնադիր Մարկ Ցուկերբերգին. վերջինս ցանկացել է սոցիալական ցանցերը խթանելու նպատակով օգտագործել Ուոթերսի գրած երգը:

Հունիսի 10-ին, ելույթ ունենալով Wikileaks- ի հիմնադիր Ջուլիան Ասանժին աջակցող ֆորումում, Ուոթերսը կարդացել է ձեռնարկատիրոջ նամակը, որն առաջարկում էր մեծ գումար Another Brick in the Wall (Part II) ստեղծագործությունն օգտագործելու համար՝ Instagram- ի և Facebook- ի խթանման արշավում:

«Սա պաշտոնական հաղորդագրություն է Մարկ Ցուկերբերգի կողմից, որն առաջարկում է հսկայական գումար, և իմ պատասխանն է. «Գնա՛ գրողի ծոցը: Ոչ մի դեպքում»,-ասել է ​​Ուոթերսը:

Նա շեշտել է, որ չի պատրաստվում մասնակցել առաջարկվող «անհեթեթությանը»:

Երաժշտի կարծիքով՝ Ցուկերբերգը ցանկանում է օգտագործել այդ երգը՝ իր սոցիալական ցանցերն ավելի ազդեցիկ դարձնելու համար և «շարունակել գրաքննել բոլորիս այս սենյակում և կանխել Ջուլիան Ասանժի մասին այս պատմության՝ հասարակության լայն շերտերին հասնելը»: