ԱՄՆ-ում Սենատը կոչ է արել վերացնել երկրում COVID-19-ի պատճառով սահմանված արտակարգ դրությունը

ԱՄՆ Սենատը հինգշաբթի հավանություն է տվել օրինագծին, որը կոչ է անում չեղարկել երկրում արտակարգ դրությունը, որը ներկայացվել է 2020 թվականի մարտին՝ նոր կորոնավիրուսի տարածման պատճառով։

Հանրապետականների ներկայացրած նախաձեռնությանը կողմ է քվեարկել 48 օրենսդիր, դեմ է քվեարկել 47 սենատոր։

Շանսերը, որ օրինագիծը հաստատվի Ներկայացուցիչների պալատում, որը վերահսկվում է դեմոկրատների կողմից, փոքր են։ Սպիտակ տունն ավելի վաղ հայտնել էր, որ ԱՄՆ նախագահ Ջո Բայդենը չի ստորագրի փաստաթուղթը, որն անհրաժեշտ կլինի դրա ուժի մեջ մտնելու համար։

2020 թվականի մարտին ԱՄՆ նախկին առաջնորդ Դոնալդ Թրամփը «ազգային արտակարգ դրություն հայտարարեց՝ կապված համաճարակի հետ»։ Այս ռեժիմը Բայդենը երկարացրել է 2021 թվականի փետրվարին։ 2022 թվականի փետրվարին Բայդենը կրկին երկարաձգեց նշված ռեժիմը՝ ընդգծելով, որ «համաճարակը շարունակում է էական վտանգ ներկայացնել հանրային առողջության և երկրի անվտանգության համար»։

Ըստ Ջոնս Հոփքինսի համալսարանի, որը հաշվարկներ է կատարում դաշնային և տեղական իշխանությունների տեղեկատվության հիման վրա, համաճարակի սկզբից ԱՄՆ-ում հայտնաբերվել է կորոնավիրուսային վարակի ավելի քան 79,1 միլիոն դեպք, մահացել է ավելի քան 955,6 հազար մարդ։ Երկու ցուցանիշներով էլ երկիրն աշխարհում առաջին տեղն է զբաղեցնում։