Ջուլիան Ասանժին, Չելսի Մենինգին եւ Էդվարդ Սնոուդենին առաջադրել են Խաղաղության նոբելյան մրցանակի
Խաղաղության նոբելյան մրցանակի դափնեկիր Մեյրիդ Կորիգանը այս պարգեւին է առաջադրել Ջուլիան Ասանժին, Չելսի Մենինգին եւ Էդվարդ Սնոուդենին, նշված է Նոբելյան կոմիտեին հղած Կորիգանի նամակում, փոխանցում է «ՌԻԱ Նովոստի»-ն:
«Երեքն էլ առանձին-առանձին առաջադրվել են Խաղաղության նոբելյան մրցանակի, բայց առայժմ ոչ մեկը չի ստացել: Իմ կողմից նրանց միասին առաջադրելու պատճառները պարզ են. նրանք առանձին-առանձին ցույց են տվել խիզախության անթիվ օրինակներ՝ բացահայտելով իշխանությունների անօրինական գործողությունները... Իսկ միասին նրանց կյանքը, անձնազոհությունն ու անձնուրացությունը ցուցադրում են մարդկային ոգու մեծությունը»,- նշում է Կորիգանը:
Նա հիշեցրել է, որ Ասանժը պահվում է Մեծ Բրիտանիայի բանտում եւ նախկինի պես ենթակա է ԱՄՆ արտահանձնվելու վտանգին, չնայած երկուշաբթի դատարանը մերժել է արտահանձնումը: Կորիգանի խոսքով՝ ԱՄՆ-ում Ասանժը կարող է ենթարկվել «դաժան, նվաստացուցիչ եւ անմարդկային վերաբերմունքի» եւ անգամ մահապատժի դատապարտվել: Չելսի Մենինգը (նախկինում Բրեդլի Մենինգ), որը տեղեկությունները փոխանցել է Ասանժին եւ դրա համար 7 տարի անցկացրել է ամերիկյան բանտում, մինչեւ ներվել է նախկին նախագահ Բարաք Օբամայի կողմից, նույնպես ճաղավանդակների հետեւում է հայտնվել Ասանժի դեմ վկայություն տալուց հրաժարվելու պատճառով, հավելել է Կորիգանը: Սնոուդենը, որը բացահայտել է ԱՄՆ հատուկ ծառայությունների հետեւելու մասշտաբային գաղտնի ծրագիրը, ապաստան է գտել Ռուսաստանում եւ չի կարող հայրենիք վերադառնալ ցմահ ազատազրկվելու մտավախություն ունենալով, հավելել է Կորիգանը:
«Խաղաղության երեք մարտիկներն էլ հետեւել են իրենց խղճին եւ սիրով են կատարել իրենց պարտքը: Ես վստահ եմ, որ նրանք վախենում էին... բայց նրանցից յուրաքանչյուրը, ծառայելով մյուսներին, արել է սքանչելի եւ վեհ ինչ-որ բան»,- նշված է Կորիգանի նամակում:
Կորիգանը Նոբելյան մրցանակը ստացել է 1976 թվականին Հյուսիսային Իռլանդիայում հակամարտության կարգավորման աշխատանքի համար: Նա Բեթի Ուիլյամսի հետ միասին հիմնադրել էր Խաղաղ մարդկանց միություն կազմակերպությունը, որը հասել է հակամարտության դադարեցմանը:
Կարծիքներ