Փաստերի իրավական կանխավարկածի ինստիտուտ ներդնելու օրինագիծն ընդունվեց առաջին ընթերցմամբ

ՀՀ ազգային ժողովն առաջին ընթերցմամբ ընդունեց ՀՀ քրեական դատավարության օրենսգրքի նախագիծը:

Այն խորհրդարանի նիստում ներկայացրել էր Արդարադատության նախարար Ռուստամ Բադասյանը:

«Նպատակն է վարույթի ամրագրումը դարձնել էլեկտրոնային: Առաջին անգամ որպես քրեական դատավարության սկզբունք ամրագրվում է իրավունքի չարաշահման արգելքը, հնարավորություն է տրվում ներդնել պահեստային դատավորի գաղափարը»,- նշել էր Բադասյանը:

Ըստ արդարադատության նախարարի՝ դա հնարավարություն կտա բուն դատավորի փոփոխության դեպքում գործը նորից չսկսել:

Նախաքննության փուլում առաջարկվում է մեծացնել պաշտպանի դերակատարությունը, հետայսու վերջինիս ներկայացրած տեղեկություններն ապացույցի կարգավիճակ կունենան: Կներդրվի փաստերի իրավական կանխավարկածի ինստիտուտը, կվերացվի նաև քրեական գործի հարուցման ձևական փուլը:

Օրենքի նախագիծն առաջին ընթերցմամբ ընդունվեց 85 «կողմ», 2 «դեմ» և 4 «ձեռնպահ» ձայներով: