Լիբանանում ցուցարարները փակել են ճանապարհները խորացող տնտեսական անկման պատճառով

Լիբանանում ցուցարարները փակել են ճանապարհները տնտեսական անկման խորացման պատճառով, ինչը հանգեցրել է վառելիքի ճգնաժամի եւ էլեկտրաէներգիայի խիստ պակասի:

Ցույցերը տեղի են ունենում վառելիքի գների բարձրացմանն ընդառաջ, ինչը, ըստ Էներգետիկայի նախարարության, ուժի մեջ է մտնելու հունիսի 29-ից:

Տեղական ԶԼՄ-ների հաղորդմամբ՝ վառելիքի պակասի պատճառով էլեկտրաէներգիայի անջատումները խափանումներ են առաջացրել մայրաքաղաքում գտնվող Բեյրութի գլխավոր հիվանդանոցում եւ անվտանգության ուժերի շտաբում:

AFP-ի թղթակիցները հայտնել են, որ Բեյրութում ցուցարարները փակել են հիմնական ճանապարհները եւ այրել անվադողեր ու աղբամաններ: Լիբանանի ազգային լրատվական գործակալությունը հայտնում է, որ մայրաքաղաքից հյուսիս եւ հարավ-արեւելք ճանապարհները նույնպես փակ են:

Լիբանանի հարավում գտնվող Նաբաթիյա քաղաքում ցուցարարները մեքենաները կայանել են գլխավոր ճանապարհի մոտ՝ երթեւեկությունը կանգնեցնելու համար:

Ցույցերը հաջորդել են հանգստյան օրերին անվտանգության ուժերի եւ ցուցարարների բախումներին, որոնց արդյունքում հյուսիսային Տրիպոլի քաղաքում վիրավորել է մոտ 20 մարդ, և այս ամենը լիբանանյան ֆունտի կտրուկ անկումից հետո:   

Տեղական արժույթն այժմ վաճառվում է ռեկորդային ցածր գնով` ավելի քան 17,000 լիբանանյան ֆունտ մեկ դոլարի դիմաց սեւ շուկայում: