Թուրքիայում տագնապի ամենաբարձր աստիճանն է հայտարարվել

Թուրքիայի Քահրամանմարաշ նահանգում 7.4 մագնիտուդ հզորությամբ երկրաշարժի հետևանքով զոհերի թիվը հասել է 76-ի, կա 440 տուժած: «Արմենպրես»-ի փոխանցմամբ՝ այս մասին հայտնում է Anadolu գործակալությունը:

Երկրաշարժը տեղի է ունեցել երկուշաբթի առավոտյան, տեղական ժամանակով ժամը 04:17-ին: Երկրաշարժից հետո մինչև տեղական ժամանակով ժամը 06:30-ը 42 հետցնցում է գրանցվել: Ամենահզոր հետցնցումը եղել է 6.6 մագնիտուդ: Հետցնցումներից 6-ը եղել են 6 մագնիտուդից բարձր հզորության:

Թուրքիայի տարբեր քաղաքներում երկրաշարժի հետևանքով 100-ից ավելի շենք է ավերվել:

Երկրում տագնապի ամենաբարձր աստիճանն է հայտարարված:

Ցնցումները զգացվել են մոտակա նահանգներում, մասնավորապես՝ Հաթայ, Օսմանիյե, Ադիըաման, Գազիանթեփ, Շանլըուրֆա, Դիարբեքիր, Մալաթիա, Ադանա նահանգներում:

Թուրքիայի իշխանությունները դիմել են միջազգային օգնության:

Երկրի գլխավոր շտաբը աղետի վայր է ուղարկել երկու ինքնաթիռ՝ փրկարարների տեղափոխման համար:

Նշվում է, որ երկրաշարժն ամենաուժգինն է եղել վերջին շուրջ 100 տարիների ընթացքում։ Ցնցումների հետևանքով Թուրքիայի տարածքում հարյուրավոր շենքեր են փլուզվել։ 

Ստորգետնյա ցնցումներն այնքան հզոր են եղել, որ դրանք զգացվել են նույնիսկ Կահիրեում:

Սիրիական SANA պետական գործակալությունն էլ իր հերթին հաղորդում է, որ երկրի նախագահ Բաշար ալ-Ասադը նախարարների կաբինետի արտակարգ նիստ է հրավիրել՝ քննարկելու երկրաշարժի պատճառած վնասները և հետագա անելիքները:  

Երկրաշարժի հետևանքով մոտ 100 մարդ է մահացել, ավելի քան 330 մարդ է տուժել Սիրիայի արվարձաններում: