ՊԵԿ-ի իրազեկումը թմրամիջոց կամ հոգեմետ նյութ պարունակող դեղորայքի տեղափոխման վերաբերյալ

Պետական եկամուտների կոմիտեն հիշեցնում է, որ ցանկացած թմրամիջոց կամ հոգեմետ նյութ պարունակող դեղորայքի տեղափոխումը համարվում է մաքսանենգություն, իսկ տվյալ դեղորայքը՝ հանցագործության առարկա: Թմրամիջոցների և հոգեմետ նյութերի անվանացանկը սահմանված է ՀՀ կառավարության 2018 թ. 707-Ն որոշմամբ:

Թմրամիջոցների, հոգեմետ (հոգեներգործուն) նյութերի և դրանց պրեկուրսորների շրջանառության կանոնների համաձայն (ՀՀ կառավարության 18.03.2010թ. N 270-Ն որոշման 1-ին հավելվածի 26-րդ կետ), սահմանը հատող անձը պարտավոր է մաքսային անցակետում լրացնել ուղևորային մաքսային հայտարարագիր՝ իր մոտ առկա, բժշկի կողմից նշանակված թմրամիջոցի քանակի և ձեռքբերման օրինականության վերաբերյալ։ Քաղաքացին տվյալ տեսակի դեղամիջոցները մաքսային սահմանով տեղափոխելու օրինական իրավունք է ձեռք բերում բժշկական փաստաթղթի հիման վրա՝ լրացնելով ուղևորային մաքսային հայտարարագիր։

Մնացած բոլոր դեպքերում կամ ծանրոցներով թմրամիջոցների, հոգեմետ (հոգեներգործուն) նյութերի և դրանց պրեկուրսորների առաքման դեպքերը, ՀՀ քրեական օրենսգրքի 267-րդ հոդվածի (Թմրամիջոցների, հոգեմետ (հոգեներգործուն) նյութերի և (կամ) դրանց պրեկուրսորների մաքսանենգությունը) 1-ին կետի համաձայն, պարունակում են հանցագործության հատկանիշներ։

Թմրամիջոց կամ հոգեմետ նյութ չպարունակող բոլոր այլ տեսակի դեղամիջոցների, օրենսդրությամբ սահմանված կարգով, տեղափոխումը չի որակվում որպես մաքսանենգություն և տվյալ դեղորայքը հանցագործության առարկա չէ: