Հունգարիան պատրաստ է միջնորդական դեր խաղալ Ադրբեջանից հայ ռազմագերիների անվտանգ վերադարձի համար. դեսպան

Հունգարիան պատրաստ է միջնորդական դեր խաղալ՝ նպաստելու Ադրբեջանում պահվող հայ ռազմագերիների՝ հայրենիք անվտանգ վերադարձին, բացի այդ՝  102 հազար եվրո է տրամադրել Հայկական կարմիր խաչին՝ Ադրբեջանի վերջին լայնածավալ ռազմական գործողությունների հետևանքով Լեռնային Ղարաբաղից տեղահանված անձանց, այդ թվում՝ վառելիքի պահեստի պայթյունից տուժածներին աջակցելու նպատակով:

«Արմենպրես»-ի հարցերին ի պատասխան այս մասին հայտնում է Հայաստանում Հունգարիայի դեսպան (նստավայրը՝ Թբիլիսի)  Աննա Մարիա Սիկոն:

Անդրադառնալով Ադրբեջանի վերջին լայնածավալ ռազմական գործողությունների և դրա արդյունքում ԼՂ-ից հայերի բռնի տեղահանումների մասին հարցին՝ դեսպանը շեշտում է, որ Հունգարիան հստակ և հաստատուն դիրքորոշում ունի բոլոր զինված հակամարտությունների վերաբերյալ, ինչը բազմիցս են արտահայտել:

«Վեճերը պետք է կարգավորվեն բանակցությունների սեղանի շուրջ դիվանագիտական ճանապարհով: Միայն մեկ կայուն լուծում կարող է լինել, և դա խաղաղությունն է»,-ասում է դեսպանը՝ հավելելով, որ դա է ճիշտը նաև կովկասյան տարածաշրջանի համար։

Հունգարիան հույս ունի, որ պատերազմներն ու մարդկանց տառապանքները շուտով կփոխարինվեն խաղաղ համակեցությամբ:

Դեսպանի վստահեցմամբ՝ Հունգարիան լիովին հասկանում է իրավիճակի լրջությունը, այդ իսկ պատճառով մի քանի օր առաջ ինքը ժամանել է Երևան, հանդիպել հայ քաղաքական և հոգևոր առաջնորդների հետ՝ քննարկելու մարդասիրական օգնություն ուղարկելու հնարավորությունը։

«Բանակցությունների արդյունքում ձեռք է բերվել պայմանավորվածություն, ըստ որի՝ Հունգարիան 102 հազար եվրո է նվիրաբերել Հայկական Կարմիր խաչին «Հունգարիան օգնում է» ծրագրի միջոցով՝ աջակցելու մարդասիրական ծրագրերին։ Հունգարական օգնության նպատակն է նպաստել տարածաշրջանում կայունությանը` օգնելով հակամարտության և վառելիքի պահեստի պայթյունի հետևանքով տուժած քաղաքացիական անձանց»,-ասում է Աննա Մարիա Սիկոն:

Հունգարիան ուրախ է, որ կարող է անհապաղ օգնություն ցուցաբերել այս սարսափելի հանգամանքներում և հնարավոր ամեն ջանք կգործադրի դա շարունակելու համար։

Ավելի վաղ՝ սեպտեմբերի վերջին լուրեր էին տարածվել, որ ԵՄ արտաքին հարաբերությունների և անվտանգության հարցերով բարձր ներկայացուցիչ Ժոզեպ Բորելի անունից տարածված հայտարարությունը, որը խստորեն դատապարտում էր Ադրբեջանին, ի սկզբանե պետք է լիներ ԵՄ անդամ 27 երկրի ընդունած համատեղ հայտարարություն, սակայն Հունգարիան վետո էր կիրառել հայտարարության ընդունման նկատմամբ:

Հայաստանում Հունգարիայի դեսպանը ԵՄ հայտարարության վերաբերյալ այս հրապարակումները համարում է փաստերի և իրականության վրա չհիմնված մեղադրանքներ։

«Մի քանի անդամ երկրներ, այդ թվում՝ Հունգարիան, մեկնաբանություններ են արել նախատեսված համատեղ հայտարարության վերաբերյալ,  վերջում չի հաջողվել կոնսենսուս ձեռք բերել, ուստի այն հրապարակվել է Բարձր ներկայացուցիչ  Ժոզեպ Բորելի անունից»,-պարզաբանում է դեսպանը:

Իսկ թե ի՞նչ դիրքորոշում ունի Հունգարիան դեռ 2021-ի մայիսից Ադրբեջանի կողմից Հայաստանի տարածքային ամբողջականությունը խախտելու փաստի վերաբերյալ՝ դիվանագետը վստահեցրեց, որ միջազգային իրավունքի հիման վրա Հունգարիան հավատարիմ է մնում ինքնիշխան պետությունների տարածքային ամբողջականության անձեռնմխելիության սկզբունքին։ Բազմաթիվ առիթներով են հստակեցրել իրենց դիրքորոշումն այս առնչությամբ։ Հունգարիան ցանկանում է, որ մարդկային տառապանքներին վերջ տրվի, որ յուրաքանչյուր մարդ հնարավորություն ունենա  խաղաղ ապրել: Դեսպանը վստահեցնում է, որ Հունգարիան միշտ աջակցել Է այս նպատակով նախաձեռնություններին և կշարունակի դա անել:

Իսկ Ադրբեջանում մինչև այժմ ապօրինաբար պահվող հայ գերիների առնչությամբ դեսպանը հավաստիացնում է. «Հունգարիան պատրաստ է կրկին միջնորդական դեր խաղալ՝ նպաստելու հայ ռազմագերիների անվտանգ վերադարձին իրենց հայրենիք»: