Բուդապեշտում մարզիչը փրկել է իր սանի կյանքը լողի անհատական մրցումների ժամանակ

Բուդապեշտում ընթացող ջրային մարզաձեւերի Աշխարհի առաջնությունում երեկ սինքորն լողի անհատական մրցումների ժամանակ հավաքվածներին մեծ անհանգստություն է պատճառել ԱՄՆ-ի ներկայացուցիչը:Անիտա Ալվարեսը ելույթի ընթացքում կորցրել է գիտակցությունն ու սուզվել լողավազանի հատակը:

Այս մասին գրում է sport.mediamax.am կայքը։

AFP-ի ֆոտոթղթակիցներին հաջողվել է ֆիքսել, թե ինչպես է Ալվարեսի մարզիչ Անդրեա Ֆուենտեսն արագ մտել ջուրն ու փրկել իր սանի կյանքը: «Անչափ շատ վախեցա: Ինձ թվաց, թե մի ամբողջ ժամ անցավ:

Գոռում էի փրկարարներին, որ ջուրը մտնեն, սակայն դա չէին անում, երեւի չէին հասկանում, թե ինչ եմ ասում: Ես թռա ջուրը, գործեցի ինչքան կարող էի արագ: Վախեցել էի, քանի որ նա չէր շնչում:

Անիտայի թոքերում մի քիչ ջուր կար, բայց երբ սկսեց շնչել, ամեն ինչ տեղն ընկավ»,-ասել է Ֆուենտեսը: ԱՄՆ-ի թիմը հաղորդագրություն է տարածել՝ նշելով, որ մարզուհին իրեն լավ է զգում և գտնվում է բժիշկների հսկողության տակ: