Սալահը ակումբային ռեկորդ է սահմանել

Այսօր՝ մայիսի 6-ին, «Լիվերպուլը» «Էնֆիլդում» ԱՊԼ 35-րդ տուրի խաղում մրցեց «Բրենթֆորդի» հետ և նվազագույն հաշվով հաղթանակ տարավ։ Այս մասին գրում է Armsport.am-ը։

Առաջին խաղակեսում հանդիպման միակ գոլը խփեց «Լիվերպուլի» վինգեր Մոհամեդ Սալահը։ Այսպիսով, եգիպտոսցին ակումբային ռեկորդ սահմանեց՝ գոլ խփելով 9-րդ տնային խաղում անընդմեջ բոլոր մրցաշարերում: «Լիվերպուլի» նախկին հարձակվող Լուիս Սուարեսին հաջողվել էր «Էնֆիլդում» 8 անընդմեջ խաղում գոլի հեղինակ դառնալ: Դա տեղի էր ունեցել 2013/2014 մրցաշրջանում։

Այս մրցաշրջանում Սալահը «Լիվերպուլի» կազմում անցկացրել է 46 հանդիպում բոլոր մրցաշարերում՝ դառնալով 28 գոլի և 9 գոլային փոխանցման հեղինակ:

Մերսիսայդյան ակումբը հիմնադրվել է 1892 թվականին։