Տաշիրի ոստիկանները ապօրինի պահվող հրացաններ են հայտնաբերել

Փետրվարի 2-ին Տաշիրի ոստիկանների աչալուրջ ծառայության շնորհիվ ապօրինի պահվող հրացաններ են առգրավվել։

Ժամը 17-ին բաժնի քրեական հետախույզները Տաշիր քաղաքի Երևանյան-Լճափնյա փողոցների խաչմերուկում շրջայցի ժամանակ նկատել են «ՎԱԶ 2121» մակնիշի մեքենա, որի սրահում հրացաններ են եղել: Վարորդը Տաշիր քաղաքի բնակիչ էր, երկու ուղևորները՝ Նորաշեն գյուղի:

Ստուգման արդյունքում պարզվել է, որ BM-16, «ԻԺ» և «Վալտեր» տիպի հրացաններից միայն վարորդին պատկանող «Վալտերն» է օրինական, իսկ երկու ուղևորների հրացաններն ապօրինի էին։ Ըստ նրանց՝ դրանք պատկանել են հանգուցյալ պապերին:

Բացի այդ, ոստիկանները մեքենայի բեռնախցիկում հայտնաբերել են աղվեսի մորթի: Ըստ 31-ամյա վարորդի՝ նույն օրը Նորաշեն գյուղի սարում իր անվամբ հաշվառված «Վալտերով» ինքն էր որսացել աղվեսն ու առանձնացրել մորթին: Հայտնաբերվել է նաև որսորդական դանակ։

Մեքենան տեղափոխվել է բաժնի հատուկ պահպանվող տարածք:

Հրացաններն առգրավվել են:

Նշանակվել է դատաձգաբանական փորձաքննություն։

Փաստի առթիվ նախապատրաստվում են նյութեր: