Ինչու՞ են ռուսական ուղղաթիռները թռչում Շիրակի տարածքով

ՌԴ ԶՈՒ Հարավային ռազմական օկրուգի ստորաբաժանումներում մեկնարկել են լայնածավալ զորավարժություններ։  ՀՌՕ մամուլի ծառայությունից հայտնել են, որ այս շաբաթվա սկզբից մարզումներ են իրականացվում Ռոստովի և Վոլգոգրադի մարզերի տարածքում,  և Հյուսիսային Օսեթիայում ու  Աբխազիայում։ Զորավարժություններին  ներգրավված են նաև ՀՌՕ կազմում գտնվող և Հայաստանի Հանրապետության տարածքում տեղակայված ռուսական 102-րդ ռազմաբազան։ Զորավարժություններին մասնակցում են  զորքերի տարբեր տեսակներ՝  զրահատանկային, հրթիռահրետանային, ավիացիա և այլն։

Նշենք, որ  այսօր Շիրակի մարզում  տեսանելի էր օդային վարժանքները։ Երկնքում հայտնվել էին մի շարք ուղղաթիռներ, որոնք թռիչք էին իրականացնում բավականին ցածր դիրքից։

Իսկ որոշ ԶԼՄ–ներ  և տելեգրամ ալիքներ տեղեկություն էին տարածել, թե, իբր, Գյումրիում տեղակայված 102-րդ ռազմակայանից արդեն մի քանի օր ռուսական ուղղաթիռները պարեկություն են իրականացնում հայ–թուրքական սահմանին` հայ–ադրբեջանական սրված իրավիճակի ֆոնին Բաքվին աջակցելու մասին Անկարայի հայտարարությունների պատճառով։

Խնդրո առնչությամբ Freenews-ին պարզաբանումներ է ներկայացրել  ՀՀ ՊՆ մամլո քարտուղար Շուշան Ստեփանյանը, նշելով, որ  դա առօրյա պատրաստություններ են և տեղյակ են դեռ  դրանց անցկացումից  առաջ։