Լեհաստանում երրորդ օրն անընդմեջ ցույցեր են անցկացվում աբորտների դեմ

Հազարավոր մարդիկ երրորդ օրն անընդմեջ դուրս են գալիս Վարշավայի եւ Լեհաստանի այլ շրջանների փողոցներ այն բանից հետո, երբ երկրի աջակողմյան կառավարությունը կատարեց դատարանի որոշում` գրեթե ամբողջությամբ արգելելով աբորտները, գրում է The Guardian-ը:

Վարշավայում ցուցարարները թափահարում էին Լեհաստանի եւ ԼԳԲՏ համայնքի դրոշները եւ իրենց ճակատներին կրում էին Women Strike կազմակերպության կողմից օգտագործվող խորհրդանիշը, որը բողոքի ցույցերի հիմնական կազմակերպիչ կողմն է:

Ցուցարարները փողոց են դուրս եկել «Իմ մարմինն իմ ընտրությունն է», «Հեղափոխությունն արգանդ ունի», «Քո ձեռքերին արյուն է» գրություններով պաստառներով:

Որոշ ցուցարարներ ուրբաթ օրը ցույցի էին դուրս եկել կանաչ գլխաշորերով պարանոցին, որն աբորտի իրավունքի պաշտպանների խորհրդանիշն է  Արգենտինայում, որտեղ աբորտներն անցյալ օրինականացվեցին:

Հինգշաբթի որոշումը կայացրած սահմանադրական դատարանի տարածք մտնելուց հետո մի քանի ցուցարար էր ձերբակալվել:

Դատարանի որոշման համաձայն` Լեհաստանում ներկայումս արգելված են բոլոր աբորտները` բացառությամբ բռնաբարության եւ ինցեստի դեպքերի, ինչպես նաեւ` այն դեպքերում, երբ մոր կյանքն ու առողջությունը վտանգված են:

Հրամանագրով սահմանվել է, որ պտղի անոմալիաների զարգացման դեպքերում արհեստական ​​ընդհատումն անհամատեղելի է սահմանադրության հետ:
Լեհաստանում տարեկան գրեթե 2000 օրինական աբորտ է կատարվում, եւ, կանանց իրավունքների պաշտպանությամբ զբաղվող կազմակերպությունների գնահատմամբ, եւս 200 000 կին աբորտ է անում կամ՝ անօրինական կամ արտասահմանում:

Կառավարությունը հայտարարել է, որ արգելքը կդադարեցնի «եվգենիկական աբորտները»` նկատի ունենալով Դաունի համախտանիշով ախտորոշված ​​սաղմերով հղիության դադարեցումը, սակայն իրավապաշտպան խմբերը հայտարարել են, որ դա կանանց կստիպի անկենսունակ հղիություններ տանել: