Դուբայի արքայազնի թանկարժեք մեքենայի վրա աղավնին բույն է հյուսել․ լուսանկար

Աղավնին բույն է դրել Դուբայի արքայազն շեյխ Համդան բեն Մոհամմեդ բեն Ռաշիդ ալ Մաքթումի թանկարժեք ամենագնացի` Mercedes-AMG G 63–ի վրա: Տեղեկությունը հայտնում է Luxury Launches-ը։

Ըստ կայքի` բնության նկատմամբ մեծ սեր տածող թագաժառանգը նկատել է, որ աղավնին բույն է հյուսել տևական ժամանակ ստվերում կայանված իր մեքենայի դիմապակու ստորին հատվածում։

Ի զարմանս շատերի` Համդանը չի քանդել բույնը, փոխարենը կարգադրել է իր աշխատողներին, որ ոչ միայն մեքենային չմոտենան, այլև հեռու մնան այդ տարածքից։

Հրապարակված տեսանյութում երևում է, թե ինչպես են նախազգուշացնող ժապավեններ կապել մեքենայի 4 կողմը:

Մինչ աղավնին կլքի այդ տարածքը, նա անկասկած կունենա աշխարհում թերևս ամենաթանկարժեք` 150 000 դոլար արժողությամբ բույնը:

Աղբյուրի փոխանցմամբ` արքայազն Համդանը կենդանիներ շատ է սիրում և հաճախ է սոցցանցային իր էջերում տարբեր կենդանիների հետ լուսանկարներ հրապարակում: