Բացահայտվել է Եվրոպայում գազի ճգնաժամի պատճառը

Գազի միջազգային ընկերության՝Linde Engineering-ի գլխավոր տնօրեն Յուրգեն Նովիցկին РИА Новости-ին տված հարցազրույցում բացահայտել է Եվրոպայում գազի ճգնաժամի պատճառը:

Նրա խոսքով ՝ Եվրոպայում գազի ճգնաժամը պայմանավորված էր ներքին պատճառներով. «ԵՄ երկրները չկարողացան ապահովել գազի մատակարարումն այն ժամանակ, երբ սահմանափակումներից վերականգնվող ազգային տնտեսությունների պահանջարկը գերազանցեց առաջարկը: Ռուսաստանը ոչ մի վատ բան չի արել, և պատճառը Եվրոպայի խնդիրներն են։ Ես կարծում եմ, որ դրանք ժամանակավոր խնդիրներ են»,-ասել է նա։

Ավելի վաղ ավստրիական OMV նավթագազային ընկերության ղեկավար Ալֆրեդ Շտերնը հույս էր հայտնել «Հյուսիսային հոսք 2»-ով Եվրոպա գազի մատակարարումների շուտափույթ մեկնարկի համար: Գազամուղի գործարկումը կօգնի կայունացնել գազի շուկան և հավասարակշռություն հաստատել առաջարկի և պահանջարկի միջև, ասել է Շտերնը: Բացի այդ, գերմանական Uniper էներգետիկ ընկերության ղեկավար Կլաուս-Դիտեր Մաուբախն ասել է, որ «Հյուսիսային հոսք 2» -ը կդառնա Եվրոպայում գազի ենթակառուցվածքի կարեւոր մասը:

«Հյուսիսային հոսք 2» -ի շինարարությունն ավարտվել է սեպտեմբերի 10 -ին: Գազատարի երկու գծերից յուրաքանչյուրի երկարությունը 1,234 կիլոմետր է, ընդհանուր թողունակությունը`տարեկան 55 միլիարդ խորանարդ մետր: Ռուսաստանից Եվրոպա գազատարն անցնում է Բալթիկ ծովի ընդերքով։