100 տարին լրացած բոլոր թոշակառուները կստանան 1մլն դրամ՝ անկախ բնակության վայրից

Հայաստանի ամբողջ տարածքում բնակվող 71 քաղաքացի, որոնց 100 տարին լրացել է կամ կլրանա 2026 թվականին, պետական մակարդակով կստանան հարգանքի և աջակցության նյութական արտահայտություն՝ միանվագ 1 մլն դրամի չափով։

Համապատասխան որոշումն ընդունվել է ՀՀ կառավարության փետրվարի 5-ի նիստում։

Որոշման հիմնավորման մեջ նշվում է, որ նախաձեռնության նպատակն է երախտագիտության և հարգանքի խորհրդանշական դրսևորում ցուցաբերել այն քաղաքացիների նկատմամբ, ովքեր իրենց կյանքի մեկ դարը նվիրել են ընտանիքին, հայրենիքին, պետությանը, աշխատանքին և հանրությանը։

Կառավարության գնահատմամբ՝ այս քայլը, բացի ֆինանսական աջակցությունից, ունի նաև կարևոր բարոյական նշանակություն՝ որպես գնահատանք մի ամբողջ սերնդի, որն ապրել և կերտել է ժողովրդի պատմության տարբեր փուլերում՝ անցնելով ծանր փորձությունների միջով։ Այդ թվում նշվում են Հայրենական մեծ պատերազմը, հետպատերազմական բարդ տարիները, երկրաշարժը, 1990-ականների պատերազմական և սոցիալ-տնտեսական դժվարությունները, ինչպես նաև քաղաքական ու հասարակական տրանսֆորմացիաները։

«Այս մարդիկ մեր ազգային հիշողության կենդանի կրողներն են, իսկ նրանց կենսագրությունները՝ մեր պատմության անբաժանելի մասը»,– ասվում է որոշման հիմնավորման մեջ։