Փարիզի քաղաքապետը կառաջադրվի որպես Ֆրանսիայի նախագահի թեկնածու

Փարիզի քաղաքապետ Անն Իդալգոն կմասնակցի Ֆրանսիայի նախագահական ընտրություններին 2022 թվականին: Այս մասին քաղաքական գործիչը հայտարարել է կիրակի ՝ BFMTV հեռուստաալիքով հեռարձակվող մամուլի ասուլիսի ժամանակ, գրում է ТАСС-ը։

«Այսօր ես պատրաստ եմ հայտարարել, որ որոշել եմ դառնալ Ֆրանսիայի նախագահի թեկնածու», - ասել է նա:

Իդալգոն չի խորացել իր նախընտրական ծրագրի մանրամասների մեջ՝ խոստանալով առայժմ հարգալից և բաց երկխոսություն վարել ֆրանսիացիների հետ ընտրությունների նախաշեմին: Միևնույն ժամանակ, նախօրյակին հայտարարվել է նրա «Ֆրանսիացի կինը» գրքի շուտափույթ թողարկման մասին, որում նա կրթության ոլորտի աշխատողների աշխատավարձերի վերանայումը համարում է աշխատանքի գերակա ոլորտ: Բացի այդ, Իդալգոն նախատեսում է մեծ ուշադրություն դարձնել բնապահպանական խնդիրներին:

Անն Իդալգոն իր կարիերան սկսել է քաղաքացիական ծառայությունում 1984 թվականին Չևիլի-Լարյու կոմունայում ՝ որպես աշխատանքային հարաբերությունների տեսուչ: 1997 թվականից աշխատել է երկրի կառավարության տարբեր պաշտոններում, 2001 թվականին նշանակվել է Փարիզի քաղաքապետի օգնական: 2014-ին նա առաջին անգամ ընտրվել է Փարիզի քաղաքապետ, 2020-ին վերընտրվել է երկրորդ ժամկետով:

Ֆրանսիայում նախագահական ընտրությունների առաջին փուլը նախատեսված է 2022 թվականի ապրիլի 10 -ին: Երկրորդը տեղի կունենա ապրիլի 24-ին, եթե թեկնածուներից ոչ մեկը չհավաքի ձայների բացարձակ մեծամասնություն: Նախագահական այս ընտրությունները լինելու են տասներկուերորդը Ֆրանսիայի Հինգերորդ Հանրապետության պատմության մեջ:

Մինչ օրս 13 թեկնածուներ հայտարարել են նախագահի պաշտոնի համար պայքարելու ցանկության մասին, սակայն դիտորդներն ակնկալում են, որ այս ցուցակը կընդլայնվի: Մինչ այժմ պետության գործող ղեկավար Էմանուել Մակրոնի կաբինետից պաշտոնական հայտարարություններ չեն արվել: