Ամերիկյան պատվիրակությունը ժամանել է Գրենլանդիա

Ամերիկյան պատվիրակությունը՝ ԱՄՆ փոխնախագահ Ջեյ ԴիՎենսի գլխավորությամբ, ժամանել է Գրենլանդիա և մեկնել Պիտուֆֆիկ բազա։ Այս մասին հաղորդում է Danmarks Radio (DR) հեռուստառադիոընկերությունը։

Նշվում է, որ բացի փոխնախագահից, պատվիրակության կազմում են նաև նրա կինը՝ Ուշա Վենսը, ԱՄՆ ազգային անվտանգության հարցերով խորհրդական Մայք Ուոլցը և էներգետիկայի նախարար Քրիս Ռայթը։ Ինչպես հայտնում է DR-ն, Վենսը ռազմաբազա կատարած այցի ժամանակ զինծառայողներին ասել է, որ ավելի լավ է հասկացել, թե ինչպես է բազան ապահովում ԱՄՆ անվտանգությունը։

Ավելի վաղ Դանիայի արտգործնախարար Լարս Լոկե Ռասմուսենը ողջունել էր Վենսի և ամերիկյան պատվիրակության կողմից Գրենլանդիայի Նուուկ և Սիսիմյուտ այցի չեղարկումը։

Թրամփի հայտարարությունները Գրենլանդիայի վերաբերյալ

Մարտի 13-ին ԱՄՆ նախագահ Դոնալդ Թրամփը վստահություն է հայտնել, որ Միացյալ Նահանգները կբռնակցեն Գրենլանդիան, որը Դանիայի ինքնավար տարածքն է։

Թրամփը մարտի 4-ին ասել է, որ հավանություն կտա Գրենլանդիայի ժողովրդի՝ Դանիայի ինքնավար տարածքը ԱՄՆ-ին միացնելու որոշմանը։ Ամերիկացի առաջնորդը նախկինում մի քանի անգամ հայտարարել է, որ Գրենլանդիան պետք է միանա ԱՄՆ-ին։ Նա սպառնացել է բարձր առևտրային տուրքեր սահմանել Դանիայի նկատմամբ, եթե այն չհրաժարվի կղզուց։

Թրամփն անգամ իր առաջին նախագահական ժամկետի ժամանակ առաջարկել էր գնել Գրենլանդիան։ Դանիայի և Գրենլանդիայի իշխանությունները մերժել են այս գաղափարը։

Գրենլանդիան Դանիայի կազմում է որպես ինքնավար տարածք։ 1951 թվականին Վաշինգտոնը և Կոպենհագենը, ի լրումն ՆԱՏՕ-ի դաշինքի պարտավորությունների, ստորագրել են Գրենլանդիայի պաշտպանության պայմանագիրը։ Դրան համապատասխան՝ ԱՄՆ-ն ստանձնել է կղզին ագրեսիայից պաշտպանելու պարտավորությունը։ Այնտեղ է գտնվում ամերիկյան Pituffik տիեզերական բազան, որն իրականացնում է հրթիռային հարձակման նախազգուշացման համակարգի և Արկտիկայի գոտու վերահսկման խնդիրները։