«Արմավիր» ՔԿՀ-ում դատապարտյալը գոգաթիակով փորձել է թմրամիջոցներ մտցնել բնակելի գոտի

2022 թվականի մայիսի 14-ին Հայաստանի Հանրապետության արդարադատության նախարարության «Արմավիր» քրեակատարողական հիմնարկի օպերատիվ բաժնում տեղեկություններ են ստացվել այն մասին, որ տեխնիկատնտեսական աշխատանքներում ներգրավված դատապարտյալն արգելված իրեր է մտցնելու հիմնարկի բնակելի գոտի:

Այս մասին տեղեկացնում է ՀՀ քրեակատարողական ծառայությունը:

Նույն օրը՝ ժամը 08:10-ի սահմաններում, ՀՀ ԱՆ «Արմավիր» քրեակատարողական հիմնարկի ծառայողները, խուզարկության ենթարկելով վերոնշյալ դատապարտյալին, վերջինիս մոտ առկա գոգաթիակում՝ աղբի միջից, հայտնաբերել են ծխախոտի տուփ, որում եղել են մարիխուանա տեսակի թմրամիջոցին նմանվող, ընդհանուր 14,32 գրամ քաշով դեղնականաչավուն զանգված, հերոին տեսակի թմրամիջոցին նմանվող, ընդհանուր 8,35 գրամ քաշով մուգ դարչնագույն զանգված և մեթամֆետամին տեսակի թմրամիջոցին նմանվող, ընդհանուր 1,19 գրամ քաշով սպիտակ, բյուրեղանման զանգված:

Դեպքի առթիվ նախապատրաստվում են նյութեր, նշանակվել է դատաբուսաբանական և դատանյութաբանական համալիր փորձաքննություն: