Էմանուել Մակրոնը ԵՄ-ին առաջարկել է մշակել սահմանների պաշտպանության նոր ծրագիր
Ֆրանսիայի նախագահ Էմանուել Մակրոնի համոզմամբ՝ Եվրամիությունը պետք է նոր մեխանիզմ մշակի Շենգենյան գոտու արտաքին սահմանների պաշտպանության համար։
«Այդ մեխանիզմը պետք է ակտիվացվի ճգնաժամի դեպքում, երբ անհրաժեշտ է ամրապնդել մեր արտաքին սահմանները», – ասել է Մակրոնը։
Նրա խոսքերով, կարելի է քննարկել ԵՄ անդամ մյուս երկրներից սահմաններ անվտանգության ուժեր ու տեխնիկա ուղարկելու հարցը։
«Եվրոպան պետք է պաշտպանի իր սահմանները», – ասել է Ֆրանսիայի նախագահը՝ ավելացնելով, որ Փարիզը կպահանջի Շենգենյան բարեփոխումներ իրականացնել այն բանից հետո, երբ հունվարին ստանձնի ԵՄ-ի ռոտացիոն նախագահությունը:
Էմանուել Մակրոնը նաև կարծում է, որ Բրյուսելը պետք է քաղաքական վերահսկողություն սահմանի Շենգենյան գոտու վրա՝ եվրոգոտու օրինակով։
«Անհրաժեշտ է պարբերաբար նախարարների հանդիպումներ անցկացնել, որոնցում կարող են որոշումներ կայացվել սահմանների ամրապնդման վերաբերյալ։ Ինձ համար ինքնիշխան Եվրոպան Եվրոպան է, որը վերահսկում է իր սահմանները», – ընդգծել է Մակրոնը՝ նկատի ունենալով իրավիճակը Լեհաստանի և Բելառուսի սահմանին և Լա Մանշում, որտեղ վերջին շաբաթներին փախստականների հետ կապված բարդ իրավիճակ է ստեղծվել:
Կարծիքներ