ԱՄՆ բանակը կստանա հեռահար հիպերձայնային հրթիռների մարտկոց

ԱՄՆ բանակը (ցամաքային զորքերը) հաջորդ տարի կստանա հեռահար հիպերձայնային հրթիռների առաջին մարտկոցը, առաջին բարձր ճշգրտության օպերատիվ-մարտավարական հրթիռները (PrSM), միջին հեռահարության հականավային զինատեսակներ։ ՏԱՍՍ-ի հաղորդմամբ՝ այս մասին հինգշաբթի օրը հայտարարել է բանակի շտաբի պետ գեներալ Ջեյմս ՄակՔոնվիլը։

«Առաջին հերթին, մենք ակնկալում ենք մեր առաջին հեռահար հիպերձայնային մարտկոցի մատակարարումը հաջորդ տարվա վերջին՝ 2023 թվականին: Որպես մեր ծրագրերից մեկի մաս՝ մենք ակնկալում ենք միջին հեռահարության հականավային սպառազինությունների մատակարարում 2023 թվականին։ Մենք ակնկալում ենք, որ առաջին գերճշգրիտ օպերատիվ-տակտիկական հրթիռները զորքեր կմտնեն 2023 թվականին»,- ասել է ամերիկացի զինվորականը Վաշինգտոնի ռազմական դիտորդների խմբի հետ հանդիպմանը։ Միաժամանակ գեներալը նշել է, որ այժմ սպառազինության փորձարկում է իրականացվում։

ԱՄՆ բանակի շտաբի պետի խոսքով՝ հրթիռները բարձր շարժունակություն ունեն, դրանք կարող են տեղադրվել C-17 ռազմատրանսպորտային ինքնաթիռների և այլ ինքնաթիռների վրա։ «Ինչպես դրանք նախագծված են, ամրագրված չեն մեկ տեղում, կարող են տեղափոխվել: Դրանք կարող են օգտագործվել որոշակի գործողություններ կանխելու համար», - ասաց Մակքոնվիլը: