Սլովենիայի ԱԺ նախագահի գլխավորած պատվիրակությանը ներկայացվել է Հայաստանի պատմամշակութային հարուստ ժառանգությունը

Այսօր Սլովենիայի Հանրապետության Ազգային ժողովի նախագահ Ուրշկա Կլակոչար Զուպանչիչի գլխավորած պատվիրակությանը ներկայացվել է Հայաստանի պատմամշակութային հարուստ ժառանգությունը։

Այս մասին «Ֆեյսբուք»-ի իր էջում գրել է ՀՀ ԱԺ նախագահի տեղակալ Հակոբ Արշակյանը:

Հյուրերի ընտրությամբ սկզբում այցելել են Սևանավանք պատմամշակութային վանական համալիր։ Համալիրի առաջին եկեղեցին կառուցվել է Սևանի կղզում 305 թվականին՝ Գրիգոր Լուսավորչի կողմից։ Այսօր Սևանավանքը Հայաստանի ճանաչված պատմամշակութային և զբոսաշրջային վայրերից մեկն է:

Հյուրերն այցելել են նաև Գառնու հեթանոսական տաճար և Գեղարդի վանական համալիր։ Գառնու հեթանոսական տաճարը 2011թվականին արժանացել է ՅՈՒՆԵՍԿՕ-ի Մելինա Մերկուրի միջազգային մրցանակին:

Գեղարդի վանական համալիրը հանդիսանում է ՅՈՒՆԵՍԿՕ-ի համաշխարհային ժառանգության մաս և Հայաստանի տեսարժան վայրերից մեկը։

Գրառման մեջ նաև ասված է.

«Գեղարդում Ուրշկա Կլակոչար Զուպանչիչին պատիվ ունեցա նվիրել ՀՀ կենտրոնական բանկի թողարկած «Սուրբ Գեղարդ» արծաթյա հուշամեդալ։

Ավանդության համաձայն, Գեղարդը 33 թվականին Հայաստան է բերել Թադեոս առաքյալը, և երկար ժամանակ պահվել է քրիստոնյա համայնքներում։

Հայոց կաթողիկոսները մյուռոնօրհնության ժամանակ Լուսավորչի Աջի հետ Սուրբ Գեղարդով ևս օրհնում են մյուռոնը։

Ներկայումս Գեղարդը պահվում է Սուրբ Էջմիածնի Մայր աթոռի թանգարանում»։