Գյումրիում փողոցաշինության աշխատանքները շարունակվում են

Գյումրու քաղաքապետարանը   կառավարության հետ համատեղ շարունակում է քաղաքի բարեկարգման և փողոցաշինության  աշխատանքները: Կառավարության  սուբվենցիոն ծրագրի շրջանակներում  Գյումրիում այս տարի նախատեսված է հիմնովին վերակառուցել 17  փողոց, ինչպես նաև  որոշ փողոցների  մասնակի հատվածներ:

freenews.am- ի հետ զրույցում Գյումրու համայնքապետարանի բնակկոմունալ և շրջակա միջավայրի պահպանության բաժնի պետ Կնյազ Մանասյանը նշեց, որ փողոցաշինության այս ծրագրի իրականացման  համար պահանջվող  970 միլիոն դրամից կառավարությունը հատկացրել է 55%-ը,  իսկ 45%-ը  համայնքը:  

Ճշտող հարցին՝  թե անցնող տարվանից  կա՞ն անավարտ մնացած ծրագրեր, Կնյազ Մանասյանը պատասխանեց.  Բացի «Մայր Հայաստան»  հուշահամալիրից Գյումրիում  կա ևս  մեկ անավարտ ծրագիր, որը դարձյալ իրականացվում է համայնք-կառավարություն սուբվենցիոն ծրագրի շրջանակներում: Այս ծրագրով այժմ հիմնանորոգման աշխատանքներ են իրականացվում  Գյումրու Երկաթգծի Նորավան թաղամասի Աղայան, Շիրվանզադե, Մեքենավարներ փողոցներում, ընդհանուր՝ մոտ 480 մետր երկարությամբ, ծրագրի արժեքը կազմում է 70 միլիոն դրամ:  Շինաշխատանքներն իրականացնում է «Ստագ» ՍՊԸ-ն:

Հիշեցնենք, Գյումրիում փողոցաշինության լայնամասշտաբ աշխատանքներ իրականացվել էին 2019  թվականին: Վերակառուցման և զարգացման եվրոպական բանկի ֆինանսավորմամբ: