ԱՄՆ-Մեքսիկա սահմանին մեքենաներում այրված մարդկային մարմիններ են հայտնաբերվել

ԱՄՆ-ի հետ մեքսիկական սահմանի մոտակայքում 19 մարդու այրված մարմին է հայտնաբերվել: BBC news-ի փոխանցմամբ՝ այս մասին տեղեկացրել են Մեքսիկայի Տամաուլիպաս նահանգի պաշտոնյաները:

Ոստիկանությունը երկու այրված մեքենա է հայտնաբերել շաբաթ: Նախնական քննությունը պարզել է, որ մարդկանց կրակել են, այնուհետև այրել: Պաշտոնյաների խոսքով՝ զոհերը կարող են փաստաթուղթ չունեցող ներգաղթյալներ լինել:

Նշվում է, որ այդ շրջանում, որտեղ ներգաղթյալները փորձում են հատել սահմանը՝ անցնելով Տեխաս, ակտիվ գործունեություն են ծավալում թմրանյութի վաճառքով զբաղվող խմբավորումները:

Տամաուլիպաս հյուսիսարևելյան նահանգը հայտնի է դաժան սպանություններով և անհետացումներով, որոնք հաճախ վերագրում են հզոր թմրակարտելների գործունեությանը և տարածքի համար նրանց պայքարին: