Ֆրանսիացի միլիարդատեր Բեռնար Առնոյի ավագ որդին նշանակվել է Christian Dior հոլդինգի գործադիր տնօրեն

Աշխարհ 10 Դեկտեմբեր 2022 | 22:12

Ֆրանսիացի միլիարդատեր Բեռնար Առնոյի ավագ որդին՝ Անտուան Առնոն, նշանակվել է Christian Dior SE հոլդինգի գործադիր տնօրեն, որը վերահսկում է LVMH (Louis Vuitton Moet Hennessy) ընկերությունների խումբը, հայտնում է Agence France-Presse-ը։

Նախկինում այս պաշտոնը զբաղեցնում էր Սիդնի Տոլեդանոն։ 45-ամյա Առնոն միաժամանակ նշանակվել է հոլդինգի տնօրենների խորհրդի նախագահի տեղակալ։ «Այս նշանակումը կոչված է ապահովելու Christian Dior SE-ի և LVMH Moet Hennessy - Louis Vuitton SE-ի ընտանիքի վերահսկողության երկարաժամկետ կայունությունը», - ասվում է Christian Dior SE-ի հայտարարության մեջ:

Le Figaro թերթի կայքի փոխանցմամբ՝ LVMH-ի նախագահ Բեռնար Առնոն դեկտեմբերի 9-ին հերթական անգամ գլխավորել է Forbes-ի վարկածով աշխարհի ամենահարուստ մարդկանց վարկանիշը՝ շրջանցելով Իլոն Մասկին։ Հրատարակության տվյալներով՝ Առնոյի կարողությունը գնահատվում է 186,2 մլրդ դոլար։