Մոլդովայում տեղական իշխանությունների կրկնակի ընտրություններն անցնում են հանգիստ մթնոլորտում

Մոլդովայի մեծությամբ երկրորդ քաղաքի՝ Բալթի քաղաքապետի, ինչպես նաև մի շարք այլ բնակավայրերի ղեկավարների արտահերթ ընտրություններն անցնում են հանգիստ մթնոլորտում, հայտնել է Կենտրոնական ընտրական հանձնաժողովը,- հաղորդում է ՏԱՍՍ-ը։

«Ընտրատեղամասերն աշխատում են սովորական ռեժիմով, քվեարկությունն ընթանում է հարթ, առանց միջադեպերի»,- ասվում է հաղորդագրության մեջ։ Կենտրոնական ընտրական հանձնաժողովի տվյալներով՝ ժամը 18:00-ի դրությամբ ընտրական շեմը հաղթահարվել է բոլոր 15 բնակավայրերում։

Բալթի քաղաքում այս պահին քվեարկել է ընտրողների 29,6%-ը, 2019-ին տեղական իշխանությունների համընդհանուր ընտրություններում այս ժամվա մասնակցությունը քաղաքում կազմել է 31,1%, լրագրողներին ասել է շրջանային ընտրական խորհրդի նախագահ Իրինա Սերդյուկը։ Նրա խոսքով, ոստիկանությունը մինչ այժմ արձանագրել է միայն մեկ խախտում՝ կապված ապօրինի քարոզչության հետ։