Բելառուսի խոշորագույն գործարաններից մեկի աշխատակիցները գործադուլ են հայտարարել «անարդար» ընտրությունների պատճառով

Բելառուսի մետալուրգիական գործարանի աշխատակիցներն օգոստոսի 10-ին գործադուլ են հայտարարել` որպես պատճառ նշելով «անարդար» նախագահական ընտրությունները: Իշխանություններն արդեն իրավապահ մարմինների մեքենաները ուղարկում են գործարանի մոտ, տեղեկացնում է NEXTA live տելեգրամյան ալիքը:

Նշվում է, որ գործարանի աշխատակիցները կոչով դիմել են այլ ձեռնարկությունների աշխատակիցներին` իրենց աջակցություն հայտնելու և միանալու խնդրանքով:

Ձեռնարկության աշխատակիցները նախօրոք զգուշացրել էին օգոստոսի 10-ից գործադուլ սկսելու մասին, եթե ընտրությունները անարդար անցնեն:

Նշվում է, որ գործադուլների մասին սկսել են հայտարարել նաև երկրի տարբեր քաղաքներում այլ գործարանների և ձեռնարկությունների աշխատակիցները:  

Հիշեցնենք, որ Բելառուսի ԿԸՀ-ն հրապարակել է ընտրությունների նախնական արդյունքները. Երկրի գործող ղեկավար Ալեքսանդր Լուկաշենկոն հավաքել է ձայների 81, իսկ  Տիխանովսկայան՝ 8%-ը:

Ընտրություններին հաջորդած բողոքի ակցիաների ընթացքում ձերբակալվել է մոտ 3 հազար մարդ, ինչի մասին ՏԱՍՍ լրատվական գործակալությանը հայտնել է Բելառուսի ներքին գործերի նախարարության մամուլի քարտուղար Օլգա Չեմոդանովան:

Նա մանրամասնել է, որ բողոքի ակցիաներն անցկացվել են լույս օգոստոսի 10-ի գիշերը՝ երկրի 33 բնակավայրում: Ըստ մամուլի խոսնակի՝ իրավախախտների նկատմամբ մարտական զենք չի կիրառվել, զոհեր չկան:

Մինչդեռ երկրի նախագահ Ալեքսանդր Լուկաշենկոն հայտարարել է, որ հետընտրական բողոքի ակցիայի մասնակիցները ղեկավարվել են Լեհաստանից, Մեծ Բրիտանիայից և Չեխայից՝ հեռախոսակապի միջոցով:

«Մենք պարզել ենք՝ զանգերը եղել են արտասահմանից՝ Լեհաստանից, Մեծ Բրիտանիայից և Չեխիայից: Նրանք զանգահարում էին ու ղեկավարում մեր, կներեք իհարկե, բայց ոչխարներին: Նրանք չեն հասկանում՝ ինչ են անում, բայց նրանց ևս կառավարելու են»,-ասել է Լուկաշենկոն ԱՊՀ Գործադիր կոմիտեի, Համադաշնության դիտորդական առաքելության ղեկավար Սերգեյ Լեբեդևի հետ հանդիպման ժամանակ:

Լուկաշենկոն նաև հայտարարել է, որ թույլ չի տա երկրում «մայդան» անել և երկիրը պառակտելու փորձերին ադեկվատ պատասխան կտա:

«Թույլ չենք տա պառակտել երկիրը»,-ասել է նախագահը: