ՀՀ ՄԻՊ-ն ընդունել է Ստեֆան Մալերիուսին և Լիանա Մարուքյանին. քննարկվել են փոխգործակցության ընդլայնման հնարավորությունները
Մարդու իրավունքների պաշտպան Քրիստիննե Գրիգորյանն այսօր ընդունել է Կոնրադ Ադենաուեր հիմնադրամի «Քաղաքական երկխոսություն Հարավային Կովկաս» տարածաշրջանային ծրագրի ղեկավար Ստեֆան Մալերիուսին և Երևանյան գրասենյակի ղեկավար Լիանա Մարուքյանին:
Այս մասին տեղեկացնում է ՀՀ ՄԻՊ աշխատակազմը:
Ողջունելով հյուրերին՝ տիկին Գրիգորյանն ընդգծել է Հիմնադրամի և Պաշպանի աշխատակազմի միջև ձևավորված արդյունավետ համագործակցությունը և այն շարունակելու պատրաստակամություն հայտնել:
Ստեֆան Մալերիուսը և Լիանա Մարուքյանն անդրադարձել են համագործակցության հիմնական ուղղություններին, համատեղ իրականացված ծրագրերին, այդ թվում՝ աշխատակազմի վերապատրաստման աշխատանքներին, ինչպես նաև հայտնել տարածաշրջանային համագործակցության խորացման շրջանակներում հայ-վրացական օմբուսդմենական հաստատությունների փոխգործակցությանն աջակցելու պատրաստակամություն:
Անդրադառնալով իր գործունեության առաջնահերթություններին՝ Պաշտպանը հատուկ շեշտել է զինծառայողների իրավունքների պաշտպանության ոլորտում արդյունավետ գործիքակազմի ներդրման անհրաժեշտությունը, ինչպես նաև կարևորել խտրականության դեմ պայքարի և կանանց իրավունքների պաշտպանության ոլորտներում աշխատանքների իրականացումը:
Պաշտպան Գրիգորյանն անդրադարձել է նաև Մարդու իրավունքների պաշտպանության ազգային ռազմավարության գործողությունների ծրագրում Պաշտպանի տարեկան զեկույցներով ամփոփված առաջարկների ներառման հնարավոր մեխանիզմների մշակմանն ուղղված ջանքերին:
Քննարկվել են փոխգործակցության ընդլայնման հնարավորությունները, ձեռք է բերվել նախանշված ուղղություններով համատեղ աշխատանքներ իրականացնելու պայմանավորվածություն:
Կարծիքներ