Երևանում ծեծի հետևանքով 62–ամյա տղամարդ է մահացել․ հարազատները փորձել են թաքցնել իրականությունը

Երեկ՝ ապրիլի 25-ին, արտակարգ դեպք է տեղի ունեցել Երևանում։ Ժամը 01։10-ի սահմաններում Երևանի շտապօգնության 4-րդ ենթակայանից ոստիկանության Էրեբունու բաժին ահազանգ է ստացվել, որ նախորդ օրը, ժամը 23։30-ին բժիշկների հերթապահ խումբը կանչով մեկնել է Նոր Արեշ 22 փողոցի տներից մեկը, որտեղ հայտնաբերել են մահացած տղամարդու, ում հարազատները հայտնել են, որ նա իրենց ներկայությամբ հանկարծամահ է եղել։ 

Shamshyan.com-ի փոխանցմամբ, հիվանդանոց են մեկնել ոստիկանության խումբը։ Նրանք պարզել են, որ մահացածը նույն փողոցի բնակիչ՝ 62-ամյա Արմեն Մ-ն էր։  Դատաժշկի նախնական եզրակացության համաձայն՝ արտաքին զննությամբ  դիակի ճակատին, ձախ ակնակապճի դրսայի եզրին, քթի մեջքին, գլխի գագաթային շրջանին հայտնաբերվել են քերծվածքներ:

Մինչ Էրեբունու ոստիկանապետի գլխավորությամբ հիվանդանոցում պարզվում էին դեպքի հանգամանքները,  հարազատները ոստիկաններին հայտնել են, որ նա վնասվածքները ստացել է վայր ընկնելու հետևանքով։

Կայքի տեղեկություններով՝ ոստիկանության և քրեական հետախուզության բաժնի ծառայողները պարզել են, որ հարազատների ասածը չի համապատասխանում իրականությանը։

Ստացված օպերատիվ տվյալներով պարզվել է՝ ապրիլի 24-ին, ժամը 20։20-ի սահմաններում Խաղաղ Դոնի թիվ 31/10 հասցեի մոտ Երևանի բնակիչներ՝ 51-ամյա Հակոբ Գ-ն, նրա որդին՝ 24-ամյա Խաչատուր Գ-ն վիճաբանել են Արմեն Մ-ի հետ, որի ժամանակ ոտքերով և ձեռքերով հարվածներ են հասցրել վերջինիս գլխին և մարմնի տարբեր մասերին՝ պատճառելով մարմնական վնասվածքներ ու նրան թողնելով անօգնական,  հեռացել են, որոշ ժամանակ անց Արմեն Մ-ն մահացել է։

Փաստի առթիվ հարուցվել է քրեական գործ,  այն ուղարկվել է Հայաստանի քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժին։ 

Ոստիկանությունը ձեռնարկում է անհրաժեշտ միջոցառումներ՝ Հակոբ և Խաչատուր Գ-երին հայտնաբերելու ուղղությամբ։