40 տարվա մեջ առաջին անգամ Օլիմպիական խաղերը չեն ցուցադրվի Ռուսաստանում

Ռուսաստանում 40 տարվա մեջ առաջին անգամ Օլիմպիական խաղերը չեն ցուցադրվի,  քանի որ, ըստ sports.ru պորտալի,  քաղաքական որոշում է կայացվել, որ ներկայիս իրողությունների պայմաններում անհնար է Օլիմպիական խաղերը ցուցադրել «Առաջին» և «Ռոսիա-1» հեռուստաալիքներով՝ առանց դրոշի և օրհներգի։

Վերջին անգամ Ռուսաստանում Օլիմպիական խաղերը չեն ցուցադրվել, երբ ԽՍՀՄ-ը բոյկոտել է 1984 թվականի Լոս Անջելեսի խաղերը։ Օլիմպիական խաղերի բոլոր վերջին հեռարձակումները կիսվել են Match TV-ի, Channel One-ի և VGTRK-ում ներառված ալիքների միջև: Միևնույն ժամանակ, 2018-ին Փհենչհանում, 2020-ին Տոկիոյում կամ 2022-ին Պեկինի խաղերում մարզիկների չեզոք կարգավիճակը խոչընդոտ չդարձավ հեռարձակման համար, հիշեցնում է sports.ru-ն։

Այս անգամ, ըստ պորտալի, «քաղաքական որոշում է կայացվել, որ ներկայիս իրողություններում անհնար է Օլիմպիական խաղերը ցուցադրել  «Առաջին» և «Ռոսիա-1» ալիքներով առանց դրոշի և օրհներգի։ Մրցույթի հեռարձակման իրավունքների գնման վերաբերյալ բանակցությունները վարում էին «Матч ТВ»-ն և «ՎԿ» հոլդինգը։ Պայմանագրեր չեն կնքվել։

Համաձայն «Կոմսոմոլսկայա պրավդա» հրատարակության՝ պատճառը  օլիմպիական խաղերի հեռարձակման իրավունքին պատկանող Telesport ընկերության ղեկավար Պյոտր Մակարենկոյի՝ խարդախության մեղադրանքով ձերբակալությունն է։ Արդյունքում հոսքային ծառայությունները՝ Okko-ն և Wink-ը, չեն գնել հեռարձակման իրավունքները։

2023 թվականի դեկտեմբերին Միջազգյաին օլիմպիական կոմիտեն որոշել է, որ Ռուսաստանի և Բելառուսի մարզիկներին կթույլատրվի մրցել միայն չեզոք կարգավիճակով՝ առանց իրենց երկրների դրոշների և ազգային այլ հատկանիշների։ Այն մարզիկները, ովքեր ակտիվորեն աջակցում են Ռուսաստանի ներխուժմանը Ուկրաինա, կամ ովքեր կապված են ռուսական կամ բելառուսական բանակի, այդ երկրների իրավապահ մարմինների և անվտանգության մարմինների հետ, չեն կարողանա մասնակցել խաղերին։

Ռուսաստանի օլիմպիական կոմիտեն (ՌՕԿ) այս պայմաններն անվանել է «անարդար», սակայն նշել է, որ ՌՕԿ-ը չի գնա «բոյկոտի ճանապարհով»։ Վերջին տվյալներով՝ 27 ռուս մարզիկ ՄՕԿ-ից թույլտվություն է ստացել մասնակցել Փարիզի Օլիմպիական խաղերին։

Ռուսաստանի ձյուդոյի ֆեդերացիան արդեն հայտարարել է, որ օլիմպիական խաղերին չի թողել մեկնել դրա իրավունքն ունեցող 4 մարզիկների, քանի որ ևս 13 հոգու թույլ չեն տվել։ Ռուսաստանի ըմբշամարտի ֆեդերացիան նույնպես որոշել է հրաժարվել խաղերին մասնակցելուց։