ՌԴ-ն ափսոսում է ՀԱՊԿ-ում Հայաստանի գործունեության «սառեցման» համար. Զախարովա

Ռուսաստանն ափսոսում է է ՀԱՊԿ-ում Հայաստանի գործունեության «սառեցման» կամ բոյկոտի համար:

Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ նշելով, որ միևնույն ժամանակ  Մոսկվան ողջունում է Հայաստանի ակտիվ մասնակցությունը ԵԱՏՄ-ում և այս տարի միությունում նրա նախագահությունը։

«Պետությունն ինքը պետք է որոշի, թե ինչն է իր համար կարևոր, ինչի կարիք ունի, մենք կարծում ենք, որ ՀԱՊԿ-ը նույնքան օգտակար է անվտանգության ոլորտում, որքան ԵԱՏՄ-ն՝ տնտեսական ոլորտում»,- ասել է Զախարովան։

Նրա խոսքով, Ռուսաստանը որևէ խոչընդոտ չի տեսնում այս երկու կառույցների շրջանակներում Հայաստանի հետ փոխգործակցության համար։

Հիշեցնենք՝ ՀՀ ԱԳ նախարար Արարատ Միրզոյանը Վարշավայում անվտանգության միջազգային ֆորումում ասել է, որ Երևանը հաշվարկում է բոլոր ռիսկերը՝ կապված ՀԱՊԿ-ից դուրս գալու որոշման հետ։

«Կարծում եմ, որ մենք բոլորս պետք է ավելի զգույշ լինենք։ Գաղտնիք չէ, որ կայունությունը պետք է առաջնահերթություն լինի, իսկ այն գործընթացը, որը կարող է տեղի ունենալ, պետք է լավ հաշվարկվի, կառավարվի։ Նկատի ունեմ, որ սա հասարակ հարց չէ»,- ասել է նախարարը։