ԱՄՆ կոնգրեսականներն օրինագիծ են ներկայացրել՝ առաջարկելով Ադրբեջանի նկատմամբ պատժամիջոցներ ագրեսիայի դեպքում

«Կովկասում լարվածության կանխարգելման և փոխգործակցության առաջխաղացման մասին» օրինագիծը (Preventing Escalation and Advancing Caucasus Engagement Act - PEACE Act, H.R.5632) նախատեսում է պատժամիջոցներ կիրառել Ադրբեջանի դեմ՝ Հայաստանի հանդեպ նոր ագրեսիայի դեպքում:

Օրինագիծը, որը ներկայացրել են հանրապետական ​​կոնգրեսական Դարելլ Իսսան և համահեղինակ Գաս Բիլիրակիսը, աջակցություն է հայտնում Հայաստանի ինքնիշխանությանը, Փաշինյանի խաղաղության նախաձեռնություններին և ռուսական ազդեցությունը հեռացնելու ջանքերին:

Սանկցիաները ներառում են ադրբեջանական պաշտոնյաների ակտիվների սառեցում, վիզաների արգելք և ֆինանսական սահմանափակումներ այն օտարերկրյա բանկերի համար, որոնք գործարքներ են կատարում ադրբեջանական նավթի առևտուրը հեշտացնող ֆինանսական հաստատությունների հետ:

Օրինագիծը նախատեսում է բացառություններ մարդասիրական օգնության և հիմնական ապրանքների համար և կգործի 7 տարի: Ընթացիկ կարգավիճակ Օրինագիծը ներկայացվել է ԱՄՆ Կոնգրեսի Ներկայացուցիչների պալատում 2025 թվականի սեպտեմբերի 30-ին և նույն օրը ուղարկվել է երեք կոմիտեների՝ Արտաքին հարաբերությունների, Արդարադատության և Ֆինանսական ծառայությունների:

Օրինագիծը գտնվում է օրենսդրական գործընթացի սկզբնական փուլում և դեռ չի քննարկվել կամ քվեարկվել կոմիտեներում: Այն պետք է հաստատվի յուրաքանչյուր կոմիտեի կողմից, ապա անցնի Ներկայացուցիչների պալատի և Սենատի քվեարկությունները՝ նախքան Նախագահի ստորագրությանը ներկայացվելը: