Մանկական երկաթուղու թունելում թանձր ծխի պատճառը հոսանքի մալուխների հրդեհն է. տեսանյութ
Երևանի Մանկական երկաթուղի տանող՝ Արամի փողոցի թունելում թանձր ծխի պատճառը բարձր լարման էլեկտրական հոսանքի մալուխների հրդեհն է:
Այս մասին հայտնեց ՀՀ ԱԻՆ փրկարարական ուժերի վարչության հրդեհաշիջման և փրկարարական աշխատանքների կազմակերպման բաժնի պետ, գնդապետ Արթուր Ոսկանյանը՝մանրամասնելով, որ արդեն հայտնաբերված է հրդեհի օջախը:
«Ահազանգը ստացել ենք մոտ 2 ժամ առաջ: Այրվում է մոտ 30 հատ մալուխ: Հետախուզություն է իրականացվում: Հորեր բացելով, ծխապատ գոտուց արդեն գտել ենք հրդեհի օջախը: Ուժերն ենք վերադասավորում, որ սկսենք մարման աշխատանքները »,-պարզաբանեց Ոսկանյանը՝ հավելելով, որ հավանաբար 6000 վոլտ լարմամբ մալուխները բռնկվել են բարձր լարումից առաջացած ջերմաստիճանից:
Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից հինգ մարտական հաշվարկ և Հրդեհաշիջման և փրկարարական աշխատանքների կազմակերպման բաժնի օպերատիվ խումբը։
Հրդեհաշիջման աշխատանքների նպատակով հոսանքազրկվել է ամբողջ հարակից տարածքը:
Կարծիքներ