Սյունիքի մարզի բոլոր նոր ավտոճանապարհները մինչև տարեվերջ կասֆալտապատվեն. նախարար

Սյունիքի մարզի բոլոր նոր ավտոճանապարհներն այս տարի կասֆալտապատվեն։ Այս մասին այսօր ՀՀ կառավարության նիստում հայտարարեց ՀՀ տարածքային կառավարման և ենթակառուցվածքների նախարար Գնել Սանոսյանը` հավելելով, որ տարվա ընթացքում պարզ կլինի` եռաշերտ ասֆալտապատում նախատեսված ճանապարհներին երրորդ շերտը կտեղադրվի այս, թե հաջորդ տարի։

«Սյունիքի ճանապարհներին ամբողջ ձմեռ աշխատանքներ արվել են։ Միայն վերջերս` շուրջ 10 օր է, առատ ձյան պատճառով աշխատանքները դադարեցվել են, բայց առաջիկա օրերին կշարունակվեն։ Տաթև-Լծենի շուրջ 20 կմ-անոց հատվածի ամբողջ հողային պաստառը պատրաստ է։ Շինարարական ընկերությունը վերջնական շտկումներն է անում, որպեսզի նախապատրաստվի ասֆալտապատման աշխատանքներին»- ասաց Սանոսյանը։

Նա նշեց, որ Վերին Խոտանանում 11 կմ շրջանցիկ ճանապարհ է կառուցվում, որի արդյունքում ոչ միայն բեռնատարներն այդտեղից դուրս կբերվեն, այլև այսօրվա ճանապարհի 16 ոլորանների փոխարեն կլինեն 6-ը։

Բայց այդ, նոր ճանապարհը արևահայաց լանջով է, ու ավելի հեշտ կլինի դրա սպասարկումը նաև ձմռանն իրականացնել։