Կրակոցներ Երևանում․ հարևանները փորձել են իրավապահներին համոզել, թե հրավառություն է եղել

SHAMSHYAN.com-ի  տեղեկություններով՝ հունիսի 24-ին կրակոցներ են հնչել Երևանում։

Այդ օրը ՀՀ Ներքին գործերի նախարարության Ոստիկանության Քանաքեռ-Զեյթունի բաժնում օպերատիվ տեղեկություններ են ստացվել, որ նախորդ օրը՝ հունիսի 23-ին, Քանաքեռցու փողոցի 126/4 շենքում բնակիչներից մեկը իր բնակարանի պատշգամբից մի քանի անգամ կրակոցներ է արձակել։

Նշված հասցե մեկնած ոստիկաններին շենքի բնակիչները փորձել են մոլորեցնել, թե ոչ մի կրակոց էլ չկա, փոխարենը՝ հրավառություն է եղել, սակայն ոստիկանները պարզել են, որ տեղեկությունը հավաստի է ։

Կրակոցներ արձակելու կասկածանքով Ոստիկանության Քանաքեռ-Զեյթունի բաժին են տեղափոխել 56-ամյա Վարդան Ա․-ին, ով այնուհետև փաստերի ճնշման տակ խոստովանել է, որ թոռան ծնունդն է եղել, սալյուտի փող չուներ, ստիպված իր մոտ եղած որսորդական հրացանից կրակոցներ է արձակել։

Վարդան Ա․-ն Ոստիկանության Քանաքեռ-Զեյթունի բաժնից ներկայացվել է Հայաստանի քննչական կոմիտեի Երևան քաղաքի քննչական վարչության Քանաքեռ-Զեյթունի քննչական բաժին, որտեղ դեպքի փաստով նախաձեռնվել է վարույթ։