Պետական նպաստների նշանակման համար անհրաժեշտ փաստաթղթերի ցանկը․ ԱՍՀՆ

ՀՀ Աշխատանքի և սոցիալական հարցերի նախարարությունը հրապարակել է պետական նպաստների համար անհրաժեշտ փաստաթղթերի ցանկը և դիմելու կարգը․

Պետական նպաստի առանձին տեսակների նշանակման համար դիմում ներկայացնելու դեպքում պետք է այցելել Միասնական սոցիալական ծառայության բնակության վայրի տարածքային կենտրոն։

Ձեզ ենք ներկայացնում դիմում գրելու համար անհրաժեշտ փաստաթղթերի ցանկը։

Չաշխատող անձի մայրության նպաստի նշանակման դեպքում՝

Անձը հաստատող փաստաթուղթ,
ՀԾՀ (սոցիալական քարտ),
հանրային ծառայությունների համարանիշ չստանալու մասին տեղեկանքը (եթե քաղաքացին չունի ՀԾՀ),
ժամանակավոր անաշխատունակության թերթիկ,
 դիմումում նշում բանկի անվանումը, որտեղից շահառուն (կամ լիազորված անձը) ցանկանում է ստանալ մայրության նպաստի գումարը,
ազատ ոճով շարադրված հայտարարություն՝ հղիության և ծննդաբերության արձակուրդի իրավունք ունենալու ժամանակահատվածի համար առաջին օրվա դրությամբ՝ օրենքով սահմանված վարձու աշխատող կամ ինքնուրույնաբար իրեն աշխատանքով ապահոված անձ չհանդիսանալու մասին, անհրաժեշտության դեպքում՝ շահառուի բանկային հաշվի համարը։
Մինչև 2 տարեկան երեխայի խնամքի նպաստի նշանակման դեպքում՝

Անձը հաստատող փաստաթուղթ,
ՀԾՀ (սոցիալական քարտ),
Երեխայի ծննդյան վկայական,
Երեխայի ՀԾՀ (սոցիալական քարտ),
Խնամակալության մասին փաստաթուղթ (եթե երեխայի նկատմամբ սահմանվել է խնամակալություն),
ծնողին վերաբերող տեղեկատվությունը ՀՀ օրենսդրությամբ որպես սահմանափակ օգտագործման ենթակա տեղեկատվություն սահմանված լինելու դեպքում ծնողի՝ խնամքի արձակուրդում գտնվելու մասին գործատուի տված տեղեկանքը (ստորագրված և կնքված գործատուի կնիքով), անհրաժեշտության դեպքում՝ բանկային հաշվեհամար։
Հարկ է նկատի ունենալ, որ մինչև երկու տարեկան երեխայի խնամքի նպաստի նշանակման համար անհրաժեշտ է դիմումը և պահանջվող փաստաթղթերը ներկայացնել Միասնական սոցիալական ծառայության որևէ տարածքային բաժին, կամ դիմումը ներկայացնել առցանց եղանակով՝ առցանց տվյալները ներկայացնելու ծրագրային միջավայր մուտք գործելով ssa.am կայքէջ:

Երեխայի ծննդյան միանվագ նպաստի նշանակման դեպքում՝

Անձնագիր,
ՀԾՀ (սոցիալական քարտ),
ՀԾՀ չստանալու մասին տեղեկանքի համարը, եթե ծնողը հրաժարվել է երեխայի հանրային ծառայությունների համարանիշ ստանալուց,
Ծննդյան վկայականը կամ երեխայի մահվան դեպքում մահվան վկայականը,
բանկի անվանումը, որտեղից ծնողը (նրա լիազորած անձը) ցանկանում է ստանալ նպաստի գումարը,
ՔԿԱԳ մարմնի տված՝ ծննդի պետական գրանցման փաստը հաստատող փաստաթուղթը։
Ծնողի՝ նպաստի իրավունքը հաստատող այլ փաստաթղթեր (ներկայացվում է ըստ պահանջի),
Ընտանիքում երկրորդ և հաջորդ երեխայի ծննդյան կապակցությամբ տրվող նպաստի համար, նոր ծնված երեխայի կարգաթիվը որոշելու համար հաշվի առնվող երեխայի (զավակի) անունը, ազգանունը, ծննդյան օրը, ամիսը, տարեթիվը, ծննդյան վկայականի սերիան և համարը, ծննդյան վկայականը հատկացնելու օրը, ամիսը, տարեթիվը, նոր ծնված երեխայի ծննդյան օրվան նախորդող 3 տարվա ընթացքում մահացած երեխաների (զավակների) մահվան վկայականի սերիան և համարը կամ կյանքի չորս շաբաթվա ընթացքում մահացած երեխայի ծննդի պետական գրանցման փաստը հաստատող փաստաթղթի համարը:
 Հարկ է նկատի ունենալ, որ երեխայի ծննդյան միանվագ նպաստը նշանակվում է նաև առցանց ներկայացված տեղեկատվության հիման վրա ssa.am կայքէջի միջոցով:

Նշանակված, սակայն դիմողի մահվան պատճառով չվճարված երեխայի ծննդյան միանվագ, ինչպես նաև մայրության կամ անաշխատունակության նպաստի վճարման դեպքում՝

Դիմումը ներկայացնող ծնողի, որդեգրողի կամ խնամակալի անձնագիրը, ՀԾՀ (սոցիալական քարտ),
այն բանկի անվանումը, որտեղից ծնողը ցանկանում է ստանալ գումարը,
Նոր ծնված երեխայի ծնողը, որդեգրողը կամ խնամակալը հանդիսանալը հաստատող փաստաթղթեր (նոր ծնված երեխայի ծննդյան վկայականը, ամուսնության վկայական, հայրության ճանաչման վկայական, դատարանի վճիռ և այլն),
ծնողի մահվան վկայականը, եթե այն տրամադրել է օտարերկրյա պետության իրավասու մարմինը։