Կրակոցներ Երևանում, կասկածյալներից 3-ը եղբայրներ են. shamshyan.com

Այսօր՝ հուլիսի 31-ին, վաղ առավոտյան Նոր Նորքում «Պալաս» առևտրի կենտրոնի հետնամասում կրակոցներ են հնչել։ Նշված վայր ժամանած իրավապահները պարզել են՝ Երևանի բնակիչ 31-ամյա Բաբկեն Մ․-ն, Կոտայքի մարզի բնակիչ 29-ամյա Ս. Ս․-ն, Երևանի բնակիչներ 38-ամյա Վ. Մ․-ն և 36-ամյա Պ. Մ․-ն կենցաղային հարցերի շուրջ վիճաբանել են Երևանի բնակիչներ 36-ամյա Ա. Հ․-ի, 61-ամյա Ա. Դ․-ի հետ: Վիճաբանությունը վերածվել է ծեծկռտուքի: Այս մասին գրում է shamshyan.com-ը:

Ըստ աղբյուրի Ա. Հ․-ն իր մոտ եղած ատրճանակից մի քանի անգամ կրակոցներ է արձակել օդ։ Նոր Նորքի ոստիկանները Բ. Մ․-ին, Ս. Ս․-ին, Վ. Մ․-ին, Պ. Մ․-ին, Ա. Հ․-ին, Ա. Դ․-ին բերման են ենթարկել ոստիկանության Նոր Նորքի բաժին։

Արման Հ․-ի մոտ հայտնաբերվել է նաև Walther տեսակի ատրճանակ։ Ըստ նախնական տեղեկությունների՝ կրակոցների արդյունքում հրազենային վնասվածքներ ստացողներ չկան։ Աղբյուրի տեղեկություններով՝ բերման ենթարկվածներից երեքը եղբայրներ են։