Բեյրութի բնակիչներին զգուշացրել են պայթյունի գոտում օդի աղտոտվածության մասին

Լիբանանի քաղաքացիական ավիացիայի գլխավոր վարչության հիդրոօդերևութաբանության բաժինը Բեյրութի բնակիչներին կոչ է արել չմոտենալ մայրաքաղաքի նավահանգստային հատված, որտեղ երեքշաբթի հզոր պայթյուն է տեղի ունեցել, հայտնում է ՏԱՍՍ գործակալությունը։

«Խորհուրդ չի տրվում Բեյրութի նավահանգստում տեղի ունեցած պայթյունի գոտուն, ինչպես նաև դրանից հյուսիս ընկած լեռնային տեղանքին մոտենալ, քանի որ այնտեղ քամու միջոցով աղտոտված օդ է տարածվում»,- ասվում է վարչության հայտարարության մեջ։

Ինչպես ավելի վաղ հայտնել է Tert.am-ը, Լիբանանի մայրաքաղաքում փորձում են ուշքի գալ օգոստոսի 4-ի երեկոյան որոտացած աղետալի պայթյունից: Բեյրութի նավահանգստում որոտացած հզոր պայթյունի հետևանքով զոհերի թիվը գերազանցել է 100-ը, վիրավորները 4000-ից ավելի են, հայտնում է Լիբանանում Կարմիր խաչի գրասենյակը: Զոհերից 6-ը հայ են:

Բեյրութն օգոստոսի 4-ի երեկոյան որոտացած հզոր պայթյունի հետևանքով աղետի գոտի է հայտարարվել, քաղաքում երկու շաբաթով՝ օգոստոսի 4-18-ը, արտակարգ դրություն է սահմանվել:

Լիբանանի Անվտանգության բարձրագույն խորհրդի արտահերթ նիստում վարչապետ Հասան Դիաբը հայտարարել էր, որ աղետի մեղավորները խիստ պատասխանատվության են ենթարկվելու:

«Բացարձակապես անընդունելի է, որ վեց տարի շարունակ նավահանգստի պահեստում 2750 տոննա ամոնիումի նիտրատ է պահվել, և նավահանգստի կառավարիչների կողմից պրոֆիլակտիկ որևէ գործողություն չի իրականացվել»,- շեշտել է Դիաբը:

Բեյրութում որոտացած ավերիչ պայթյունի հետևանքով մեծ վնասներ են կրել նաև հայկական համայնքային կառույցները:

«Վնասվել են Անթիլիասի Մայր Տաճարի, Վեհարանի, հայագիտական և մանկավարժական կենտրոնների, ինչպես նաև՝ «Կիլիկիա» թանգարանի դռները, պատուհանները, ջահերը»,- ասված է կաթողիկոսարանի տարածած հաղորդագրությունում: