ԱՄՆ-ն Ադենի ծոցում խոցել է հութիների հրթիռը և իրանական երեք անօդաչու թռչող սարք

Ամերիկացի զինվորականները Ադենի ծոցում խոցել են Եմենի հութի ապստամբների՝ Անսար Ալլահի հականավային հրթիռը և իրանական երեք անօդաչու թռչող սարքերը (ԱԹՍ): Այս մասին չորեքշաբթի օրը հայտնել է ԱՄՆ կենտրոնական հրամանատարությունը։

«Հունվարի 31-ին, մոտավորապես ժամը 20:30-ին, Սանայի ժամանակով, Իրանի կողմից աջակցվող հութիները Եմենի հութիների վերահսկողության տակ գտնվող տարածքներից հականավային բալիստիկ հրթիռ են արձակել դեպի Ադենի ծոց: Հրթիռը հաջողությամբ խփվել է կործանիչ USS Carney-ի կողմից»,- ասվում է հրամանատարության կողմից հրապարակված հաղորդագրությունում X սոցիալական ցանցի իր էջում (նախկինում՝ Twitter): «Սանաայի ժամանակով ժամը 21:10-ին USS Carney-ը խոցել է իրանական երեք անօդաչու թռչող սարք»: