Լոնդոնը կարող է հրաժարվել Իրանի միջուկային համաձայնագրից բրիտանացիների մահապատժից հետո

Մեծ Բրիտանիան կարող է հրաժարվել Իրանի միջուկային ծրագրի շուրջ Գործողությունների համատեղ համապարփակ ծրագրին (JCPOA) աջակցությունից այն բանից հետո, երբ Իրանի իշխանությունները մահապատժի ենթարկեցին Ալիռեզա Աքբարիին, ով ուներ Իրանի և Մեծ Բրիտանիայի երկքաղաքացիություն։ Այս մասին շաբաթ երեկոյան հայտնել է The Sunday Telegraph-ը։

Ըստ բրիտանական կառավարության բարձրաստիճան աղբյուրների, թագավորության դիրքորոշումը վերանայվում է, քանի որ իրավիճակը զգալիորեն փոխվել է 2005 թվականի համեմատ, երբ սկսվեցին բանակցությունները Իրանի հետ, որոնց արդյունքներն այնուհետև դրվեցին միջուկային գործարքի հիմքում։ Ինչպես նշել է հրապարակման զրուցակիցներից մեկը, մոտեցումները փոխվել են հիմնականում «իրանական ռեժիմի գործողությունների արդյունքում»։

Իրանում Աքբարիի և մի քանի փողոցային ցուցարարների մահապատիժը մեծացրել է լարվածությունը Թեհրանի և արևմտյան մայրաքաղաքների միջև։ Ի պատասխան՝ Լոնդոնը պատժամիջոցներ սահմանեց երկրի գլխավոր դատախազ Մոհամմադ Ջաֆար Մոնթազերիի դեմ, Մեծ Բրիտանիայում Իրանի գործերի ժամանակավոր հավատարմատարին կանչեց արտաքին գործերի նախարարություն և ժամանակավորապես հետ կանչեց Մեծ Բրիտանիայի դեսպանին Թեհրանից խորհրդակցությունների համար։ Արտաքին գործերի նախարարության ղեկավար Ջեյմս Քլեվերլին ընդգծել է, որ իր գրասենյակն այսքանով չի սահմանափակվելու, մինչդեռ վարչապետի գրասենյակը նշել է, որ իրենք դիտարկում են հետագա գործողությունների «բոլոր տարբերակները»: