Առաջիկայում անպայման քննարկելու ենք Ընտրական օրենսգրքի համապարփակ փաթեթը. Մակունց

Իշխանությունը, Ընտրական օրենսգրքում փոփոխությունների նախագիծ ներկայացնելով, չի հրաժարվում Ընտրական օրենսգրքի համապարփակ փաթեթից, որով մի շարք փոփոխություններ են նախատեսվում: Այս մասին ասաց «Իմ քայլը» խմբակցության ղեկավար Լիլիթ Մակունցը ԱԺ-ում «Հայաստանի Հանրապետության ընտրական օրենսգիրք» սահմանադրական օրենքում փոփոխություններ եւ լրացումներ կատարելու մասին օրենքի նախագծի քննարկմանը:

Մակունցը հիշեցրեց, որ 2018-ին «Իմ քայլը» դաշինքի նախընտրական խոստումը և քաղաքական հանձնառությունն է եղել՝ 7-րդ գումարման ԱԺ-ի ընթացքում ընդունել  Ընտրական օրենսգրքի փոփոխություններ, որով կնախատեսվի ռեյտինգային ընտրակարգից հրաժարում և պարզ համամասնական ընտրակարգի անցումը: «7-րդ գումարման ԱԺ-ն ձևավորվել է 2019-ի հունվարին, նույն տարվա ամառվանից ձևավորվել է աշխատանքային խումբ, որը ներառելով խորհրդարանական և արտախորհրդարանական քաղաքական ուժերի, առանձին մասնագետների, քննարկել է Ընտրական օրենսգրքի նոր փաթեթը: 2020-ի աշնանը նախատեսվում էր ընդունել այս Ընտրական օրենսգիրքը, սակայն պատերազմով պայմանավորված, այն հետաձգվել է և այդ իսկ պատճառով փաթեթը Վենետիկի հանձնաժողով՝ կարծիք ստանալու համար ուղարկվել է 2021-ի փետրվարին»,-ասաց Մակունցը:

Նա վստահեցրեց, որ այս ընթացքում խորհրդակցություններ են ունեցել խորհրդարանական, արտախորհրդարանական ուժերի հետ, մասնագիտացված կառույցների հետ, նախագահի ինստիտուտի հետ քննարկվելով նախագիծը, եկել են այն եզրակացության, որ որպեսզի որևէ կերպ Ընտրական օրենսգիրքը չբարդացնի առաջիկա ընտրությունները և ավելի պարզեցնեն ընտրությունների ընթացքը, այս փոքր փաթեթով միայն փոփոխություն կատարեն համամասնական ընտրակարգի վերաբերյալ և անցում կատարեն ամբողջապես պարզ համամասնական ընտրակարգի: «Սա չի նշանակում հրաժարում՝ ամբողջ Ընտրական օրենսգրքից, և մենք առաջիկայում անպայման քննարկելու ենք նաև համապարփակ փաթեթը»,-ասաց խմբակցության ղեկավարը:

Իշխանությունը նոր Ընտրական օրենսգրքի փաթեթն ուղարկել է Վենետիկի հանձնաժողով՝ կարծիք ստանալու: ԱԺ-ում քննարկվող նախագծով առաջարկվում է հանել ռեյտինգային ցուցակը՝ ընտրությունների գնալով մաքուր համամասնական ընտրակարգով, նաև նախատեսվում են որոշակի կարգավորումներ՝ համավարակի պայմաններում ընտրությունների անցկացման առնչությամբ: