Խորհրդակցություն՝ նվիրված Դատական կատարողի համաշխարհային օրվան

Գլխավոր հարկադիր կատարող Սերգեյ Մեղրյանի գլխավորությամբ այսօր՝ հունիսի 9-ին, Հարկադիր կատարումն ապահովող ծառայության ղեկավար կազմի մասնակցությամբ տեղի է ունեցել խորհրդակցություն-քննարկում՝ նվիրված Դատական կատարողի  համաշխարհային օրվան, որը նշվում է 15-րդ անգամ:

Ամենամյա այս միջոցառմանը տարբեր ձևաչափերով մասնակցում են Դատական կատարողների միջազգային միության անդամ պետությունները։ Այս տարի  քննարկման թեման է «Հարկադիր կատարողը՝ փոփոխվող աշխարհում կայունության համար պայքարող»։

Գլխավոր հարկադիր կատարողը բացման իր խոսքում անդրադարձել է Դատական կատարողների միջազգային միության հետ Հարկադիր կատարումն ապահովող ծառայության արդյունավետ ու ակտիվ համագործակցությանը` միջազգային գործընկերության ամրապնդման, հարկադիր կատարման ոլորտի բարեփոխման, կորոնավիրուսային համավարակով պայմանավորված ճգնաժամային իրավիճակի հաղթահարման գործընթացում ծագած խնդիրների լուծման ուղիների հարցում: Միության կողմից միջազգային լավագույն փորձի հիման վրա խորհրդատվության տրամադրման ուղղությամբ։ Նրա խոսքով՝ այս տարի քննարկվող թեման մեզ համար ևս կարևոր է այն իմաստով, որ հետքովիդային և հետպատերազմական իրավիճակում՝ փոփոխվող իրողությունների ֆոնին, հարկադիր կատարողն իր ամենօրյա աշխատանքով հաղթահարում է նոր մարտահրավերներ՝ ի պաշտպանություն ծառայության շահառուների իրավունքների։

Թեմատիկ խորհրդակցությանը զեկույցներով են հանդես եկել գլխավոր հարկադիր կատարողի տեղակալ Լևոն Բալյանը, գլխավոր հարկադիր կատարողի օգնականներ Վարդուհի Պետրոսյանն ու Էլինա Գեղամյանը, Հարկադիր կատարումն ապահովող ծառայության իրավաբանական բաժնի պետ Գոհար Մկրտչյանը, ոչ գույքային բնույթի կատարողական վարույթների հատուկ բաժնի պետ Վարդան Մելիքբեկյանը։

Բանախոսներն իրենց ելույթներում անդրադարձել են հետճգնամային իրավիճակում ծառայության և Դատական կատարողների միջազգային միության միջև փոխգործակցությանը, հարկադիր կատարման ոլորտում իրականացված բարեփոխումներին, դրանց շարունակականությանը, դատական պաշտպանության հիմնարար իրավունքի երաշխավորման և իրացման համատեքստում հարկադիր կատարման համակարգի կայունության և կանխատեսելիության կարևորությանը, ճգնաժամային իրավիճակներում ոչ գույքային բնույթի կատարողական վարույթների իրականացմանը, ինչպես նաև պետական կառավարման համակարգում ճգնաժամային և հակաճգնաժամային հաղորդակցության հստակ ռազմավարության մշակման անհրաժեշտությանը։

Խորհրդակցության ավարտին տեղի է ունեցել մտքերի փոխանակում։ Բարձրացված հարցերի շուրջ ծավալվել է ակտիվ քննարկում։

ՀՀ ԱՆ հարկադիր կատարումն ապահովող ծառայությունը Դատական կատարողների միջազգային միության լիիրավ անդամ է 2015 թվականից: 1952 թվականին ձևավորված Միությանն այսօր անդամակցում է ավելի քան 96 պետություն։